Segun Valdes “na 2025 no tin B.P. (Bashi Premie) ni G.B. (Gelijk Bedrag) mas pa Pensioenadonan y otro trahadornan den sector publico”.
E frase cu sr Valdes a scirbi cu e G.B. y B.P. ta un compromiso di Gobierno pa perdidanan di poder di compra den añanan atras y e compromiso aki ta limita na 10 aña, ta completamente for di sla y cual ta mustra ariba un defensa pa e mal hecho cu a kita B.P. y G.B..
E areglonan di G.B. y B.P. ta sali for di e acuerdonan di Indexering di e añanan 90 di siglo pasa. Mi persona tabata e vocero di sindicatonan den sector publico y a negocia e acuerdonan aki.
Nunca nan tabata Compromiso di gobierno y mara na 10 aña.
Gobierno semper a cumpli cu nan te awe y pa un grupo te cu 2015.
Nunca mi a bisa cu Valdes lo ta presidente di SIMAR na 2014/2015, mi ta na altura cu otro persona tabata presidente.
Pa e hecho cu sr Valdes ta defende e ponencianan falso cu e B.P. y G.B. ta un compromiso di e Gobierno (2010-2017) cu a haci hopi daño na e pensioenadonan di OPPA, na ambtenaarnan y na trahadornan di Fundacionnan, aserca cu e compromiso aki a keda limita dor di e Gobierno malo pa un periodo di 10 aña, ta pone hopi hende y mi persona conclui cu Sr Valdes ta pro e pensamento di gobierno na 2014/2015 y di esnan den mundo sindical kendenan a cambia e acuerdonan di añanan 90 di siglo pasa.
Pa e motibo aki mi a scirbi cu sr Valdes tabata un lider sindical, esta un miembro di directiva di SIMAR na 2014/2015. Mi disculpa na sr Valdes, si no ta asina.
Falta di informacion pakico a cambia e acuerdonan ariba B.P. y G.B., tambe ariba pensioen.
Dos asunto mi kier corregi sr Valdes. Uno e NPR (Nieuwe Pensioenregeling) a cuminsa na mei 2005, pero solamente pa ambtenaarnan nobo. Di dos e Dekkinsgraad= Grado di Cobertura di APFA, na final di 2010 no tabata 85%, pero algo bao 70%. Pues hopi mas pio. Ami tambe tabata pro e cambio na 2010.
Poco a poco e berdadnan ta sali na cla cu Lidernan sindical, hunto cu Gobierno di Mike Eman na 2014/2015, traicionando trahadornan a kibra e acuerdonan ariba indexering di añanan 90, y a mara e G.B. y B.P. na 10 aña, te cu 2024.
Ta bon pa e lidernan sindical cu a kibra e acuerdonan ariba G.B. y B.P. di añanan 90, pa nan papia. Igualmente for di sr Mike Eman, awe den campaña electoral pa e splica, e motibonan pakico nan a hacie.
Si trahadornan no lucha contra e cambionan aki, mayan Gobierno ta elimina ATV-dagen y otro areglonan accorda pa ambtenaarnan.
