3.1. Semper ta e clase trahador ta paga bek e debenan.
Dor di maneho politico malo, awe nos conoce un debe nacional hopi halto y ta un asunto cu nos pueblo y futuro politiconan mester sa con halto e ta.
Pesey un refleccion kico a pasa na Aruba cu su debenan. Cu entrada di Status Aparte nos a cuminsa cu un debe di banda di 150 miyon florin for di Hulanda. Esaki cu e proposito pa Aruba drenta Status Aparte manera a keda palabra y pasa e periodo dificil na inicio. Dor di seramento di e refinaderia Lago na 1985, nos presupuesto a ricibi un sla grandisimo.
Di eynan nos debenan a cuminsa crece. Awendia na Aruba nos por wak un situacion no-normal. Bo ta wak un crecemento economico grandisimo , pero ariba tereno social no tin un crecemento igual. Awe nos parce Brazil den e añanan 70 di siglo pasa, cu nan tabata bisa cu na Brazil tin un milager economico, ya cu economicamente dor di e placa fia di e tantisimo debenan, a crea un crecemento economico cu pasonan grandi.
Pero ora cu mester a cuminsa paga e debenan, e crecemento a stop, Brazil casi a bati bancarota y mester a tuma medidanan pisa contra e clase trahador. Defacto e riconan, empresarionan ta saca nan placa, nan empresanan ta bati bancarota y Gobierno=trahadornan ta keda cu e debenan y nan tin cu paga e debenan. Kico ta spera nos cu nos debenan grandisimo? Nos no sa, pero Gobierno mester tuma e medidanan necesario cu e pueblo trahador ta bay paga, pa nos no cay den abismo.
Pesey e clase trahador mester ta alerta y sa e altura di e debenan y dicon nan a yega eynan.
3.2. Politica di garantia a FAYA y esaki a yuda acumula nos debenan.
Pa sigui cu nos debenan, E Gobierno na 1986/88 di Prome Ministro Henny Eman a bende casi tur hotelnan cu tabata di gobierno na prijs di baca flaco. Tambe e mesun gobierno e añanan aki a deal cu Mafia pa construi Hotelnan, pero cu garantia di gobierno di Aruba. Garantia kiermeen cu si e proyecto faya=bay mala, gobierno mester paga bel tur e placa fia na e banconan, cualnan a presta placa na e companianan mafioso. Esey tabata e
“Faya-Bo-Haya” y cual a sosode tambe, nos por corda e nombernan BETA, Promotora y mas nomber, cual hotelnan mitar construi a keda como ruina y tabata duna un mahos bista na nos playanan durante varios aña. E proyectonan aki a costa Aruba bastante ciennan di miyon florin pa Aruba paga bek na e banconan cu a fia placa na e malvadonan, specialmente banconan na Italia.
Un asunto real, bo por wak e den un forma chistoso, pero berdad. Esta na momento cu parlamento di Aruba a aproba e garantianan, ya e capo di tur e caponan “Al Capone” tabatin tur e proyectonan cu garantia den su saco.
Mi ta skirbi e episodio aki pasobra esaki ta tambe parti di historia di nos turismo y nos debenan na Aruba. E ta e prome desaster di nos industria turistico. Dor di malmaneho o mihor bisa un maneho decidido pa laga e compania estatal, di nos tur, cu tabata yama Aruven, doño di hotelnan bati bancarota. Privatisacion a drenta, cu cosnan bon pero tambe mustrando su cara malvado.
3.3. Nos debe nacional a crece grandi durante gobernacion 2010-2017
Nos debenan na final di 2010 tabata banda di 40% di nos GDP y e maneho di desaster di Gobiernonan for di 2010 pa 2017 a redobla e percentahe di nos debenan compara cu GDP y pasando 80% di nos GDP. GDP ta un cifra den florin y cual ta representa loke nos tur na Aruba ta produci e aña ey.
Manera mi a splica prome, durante e prome decada di siglo 21 nos debe tabata fluctua banda di 40 pa 42% di nos GDP.
Tambe ta bon pa menciona cu IMF y otro instancianan financiero ta recomenda pa e debe di un pais no surpasa 60%. E ta bira dificil pa paga bek y mester tuma medidanan pisa contra e pueblo trahador.
Pa final di 2017, esaki a pasa 80%, gran parti dor di un Gobernacion cu a conoce presupuestonan pa basta aña cu deficitnan di algun cien miyon florin. Nos por corda con Hulanda a interveni y gobernador ariba instruccion di Hulanda no a pone su firma bao e presupuesto di 2014, cu un deficit di como 400 miyon florin.
E deficitnan grandi di ciennan di miyon cada aña a pone cu desde 1 januari 2015, Hulanda a pone Aruba bao supervision cu e LAFT (Landsverordening Aruba tijdelijk Financiel Toezicht). Esaki ta e consecuencia ora e situacion cu presupuestonan for di sla cu deficitnan grandi di e gobiernonan Eman. Nos por corda con sr Eman a purba di preveni e medida di Hulanda cu un welga di hamber fracasa. E situacion a sali for di man a consecuencia di e debenan grandi. Tin un proverbio na Papiamento cu por ser aplica den e caso aki:
“No tin awa mas pa laba”.
Tambe, e temporada aki, na 2014 y 2015, a caracterisa su mes cu medidanan fuerte contra e trahadornan den Sector Publico. Malgastamento di placa a causa cu tabatin menos placa pa trahadornan. No tabatin indexering, e areglonan di Pensioen den APFA a bira menos. Gobierno uzando e tema di Pensioen a kibra acuerdonan ariba Indexering di e añanan 90 di siglo pasa, manera stopmento di Gelijkbedrag y Bashi-premie pa cierto gruponan di pesioenadonan, a elimina e Subsidiale regeling pa trahadornan di Fundacionnan, perhudicando e trahador di fundacionnan grandemente. Mester menciona alaves cu tur e accionnan anti-trahador a ricibi un actitud complaciente di cierto lidernan sindical. E maneho desastroso aki, por ser mira como un maneho anti-trahador.
3.4. RAFT (Rijkswet Aruba Financieel Toezicht)
Despues nos a conoce COVID, cual a laga nos cu un debe di 915 miyon florin pa e percentaha di nos debenan yega na banda di 95% di nos GDP. Na 2023 tin cifranan cu ta mustra cu nos debenan total ta 5.919 miyon florin= 95% di nos GDP cual ta na 6.202 miyon florin.
Den presupuesto 2023 ta para den e parti di gastunan, un suma di 249 miyon florin pa paga interes ariba e debenan. Mi cifranan por ta te cu 5% mas halto o te cu 5% mas abao, pero ta bay cu nos tin un bista di loke e situacion ta. Hopi ta e cifranan cu nos tin di custumbra cu nan.
RAFT (Rijkswet Aruba Financieel Toezicht) a drenta na vigor pa Aruba e aña aki Gobierno di Aruba a bay di acuerdo cu ne, despues di a lucha contra di dje pasobra e ta mishi cu nos autonomia.
Control financiero ta pa Hulanda tin un control ariba e finansanan di Aruba, si e maneho ta di acuerdo cu loke Hulanda kier, kibrando nos autonomia. Hasta por bisa cu e budget-recht=derecho pa parlamento di Aruba pa stipula e presupuesto no t’ey mas. Nos tin un presupuesto di RAFT.
3.5. Hulanda a hunga un wega sushi. E pregunta?
Mester menciona si cu den e caso aki Hulanda ta un sorto di abusador. E debenan cu a pone e hemchi di debenan di Aruba pasa over ta e 905 miyon florin cu Gobierno di Aruba a fia den e periodo dificil. Hulanda kier pa Aruba page cu un interes halto di 6 pa 8%. Aruba tabata desea di paga esaki bek na un interes abao abao. Hulanda ta di acuerdo cu interes abao pero cu introduccion di e RAFT. Gobierno di Aruba alfin mester a bay di acuerdo cu Hulanda.
Pa tur hende cu dos placa di sinti, e ta un menasa baho di Hulanda pa e bay dicta e maneho financiero na Aruba y na otro islanan, esta laga nos Status Aparte=nos autonomia na werki. Pakico baho di Hulanda? Bo a duna nos un prestamo, pa nos pasa un periodo dificil, COVID, cu nos ta contento cu ne, pero bo ta exigi pa nos paga bek cu interes abao solamente si nos entrega nos autonomia. Si no e interes ta 2 te 3 biaha mas halto. Foei!
Pa finalisa, despues di a expone e problema grandisimo di debe y hopi mahos pa gobierno, pa partidonan politico y pa pueblo trahador Arubiano, mundo Sindical y tur trahador na Aruba mester puntra e lidernan politico: Con boso ta bay enfrenta e problema di nos debenan grandi y kico ta e posibel medidanan y solucionnan?
