Diahuebs atardi den sala di conseho di minister a tuma luga encuentro cu e Comite di Herencia di Sclavitud, caminda cu a presenta oficialmente e representante pa pais Aruba Sr. Gregory Richardson.
Pa e ocasion aki, Prome Minister di Aruba mr. Mike Eman, a reuni cu e delegacion cu ta representacion e comite.
E delegacion cu ta representa e Comite di Herencia di Sclavitud ta:
- Sra. Astrid Elburg – Presidente di Comite di Herencia di Sclavitud
- Sra. Lucia Beck – Sub-director di e Organisacion di Trabou
- Sra. Jefka Alberto – Community Manager
- Sra. Nathania Engelhardt – Coordinado di Hubentut
- Sra. Tirza Snoijl – Community Manager
Reunion tabatin como punto principal, e introduccion di e representante pa Aruba Sr. Gregory Richardson den e comite. Sra. Elburg a haya e reunion fructifero y ameno, caminda por a sinti e reaccion di tur presente, y e intencion concreto pa traha hunto.
Ta mira un cooperacion mutuo pa asina trece un ceremonia digno pa asina recorda y rindi honor aki na Aruba, pero tambe dialogo riba planificacion intergeneracional pa conmemoracionnan den futuro y conexion cu e comunidadnan.
Di su banda Sr. Gregory Richardson tambe a expresa su conviccion como miembro nobo. E introduccion oficial na Herdenkingscomite Slavernijverleden a tuma luga y awo su participacion por cuminsa.
Comite di Herencia di Sclavitud
A forma Comite di Herencia di Sclavitud, pa honra y recorda e pasado di sclavitud di Hulanda di un manera digno. E comite ta activo den tur Reino Hulandes, incluyendo Hulanda y e parti Caribense di e Reino. E ta consisti di un presidente y miembronan di Hulanda y di e parti Caribense di e Reino, cu e posibilidad pa Surinam agrega un representante.
E Instituto Nacional pa Herencia y Pasado di Sclavitud Hulandes (NiNsee) tambe tin asiento den e comite y lo keda, te cu 2027, bao direccion di e Comite di Herencia, involvi den e realisacion di e Herencia Nacional riba 1 di juli den Oosterpark na Amsterdam.
Pa Sr. Gregory Richardson, e ta mas cu un honor pa por duna su aporte, teniendo na cuenta cu e capitulo di e historia aki tin su tempo scur, sin embargo e victimanan y nan decendientenan riba nos isla a sa di saca forsa, surpasa y crea cosnan impactante.
Lo boga pa mas investigacion, duna honor na e antepasadonan y fortalece laso cu otro y di un manera siña di otro pa asina e siguiente generacionnan por bay dilanti y ta orguyoso di nan antepasado.
