ORANJESTAD, 15 Februari – Riba Februari 11 ultimo, Gobierno di Aruba a anuncia cu lo tene un parada nacional dia 26 di Februari proximo. E anuncio no a cai den bon tera serca comerciantenan. Gremionan: AFBA, AHATA, CUA, ATIA, y KvK, di forma collectivo, ta puntra con por organisa un evento di tal magnitud prome cu suavisa medidanan pa nos communidad y tanten cu CDC ainda ta conta cantidad di caso nobo pa alerta di biahe?

Aruba ta depende di turismo y e comerciantenan no ta mira e balor agrega di un parada nacional na momento cu nos ta den pleno recuperacion financiero. E evento aki tin chance di retrocede un biaha mas e progreso cu nos a haci durante e ultimo luna nan. Nos ta urgi Gobierno di Aruba pa reconsidera e evento aki y tene den un luna manera Mei cu ta low season y lo tin hopi menos riesgo cu e efectonan por ta desfavorecedor pa turismo, comercio y henter nos isla. Cu mas tempo pa planea e evento aki tambe lo tin mas beneficio, manera promocion mas amplio y mihor preparacion di parti di sectornan envolvi den un parada di e magnitud aki.

E gremionan activo a wordo informa cu lo suavisa y elimina mayoria medida dia prome di Maart 2022, pero awor ta nota cu diripente por hala tur medida pa acomoda un evento di Gobierno mes. E medidanan vigente, manera orario di cierre y maximo persona na mesa a sigui perhudica comercio, mientras cu fiesta grandi ta permisibel. Awor nos mesun gobierno ta organisa, pa marca fin di pandemia, un evento di gran escala durante cual lo permiti un multitud di hende sin tapa boca, sin tene distancia, cu tur e consecuencia nan cu esaki lo por tin pa henter e isla.

Gremionan ta recomenda gobierno pa prome elimina e medidanan, duna espacio pa midi e resultadonan, y pa despues organisa un evento di gran escala. E gremionan ta enfatisa e desacuerdo cu organisacion di un parada nacional, cual por wordo considera irresponsabel, especialmente tumando na cuenta cu nos isla ta purbando di bai back na normalidad. E evento aki no ta den linea cu locual comercio y henter e poblacion di Aruba a haci pa por opera na un forma cu ta stimula nos economia local. Nos ta curioso pa sa si acaso CDC lo stop di considera e cantidad di caso nan despues di dia 26 di Februari? Y kico lo pasa si e cantidad di contagio subi drasticamente despues e parada? Nos lo por core riesgo di sigui mas tempo riba lista di pais di riesgo halto na Merca? Kico esaki lo nifica pa nos economia y con Gobierno di Aruba lo actua en dado caso?

LEAVE A REPLY

Please enter your comment!
Please enter your name here