WILLEMSTAD – Pa medio di e anunsio aki, grupo A’legria ta desea di trese klaridat pa ku e situashon ku a kousa retraso Djadumingu, 11 di Febrüari, 2024.
Djadumingu di Gran Marcha, a surgi un retraso den salida di Grupo A’legria pa motibu di un kòntròl di papeleo dirigí pa entre otro kuerpo polisial. Durante e kòntròl aki a sali na kla ku e number di chasis di e trèker, no tabata kuadra ku e number di chasis ku tabatin riba e keuringskaart di e vehíkulo.
E suseso aki ta lamentabel, mirando ku tur trèker, trailer, demas vehíkulo i karosa a pasa keuring manera debe ser, inkluso e trèker ku a keda kontrolá Djadumingu di Gran Marcha.
Komo Grupo, nos a hür trèker via di un kompania lokal ku ta ofrese e servisio aki. E mesun trèker ku a keda pará Djadumingu di Gran Marcha, a kore sin ningun problema durante marcha hubenil i tambe tiner parade.
Nos komo maneho di Grupo A’legria ta partisipa i inverti den karnaval ku hopi amor, dedikashon, i
pashon. Na momento ku nos ta partisipa i maneha for di un distansha, ta difisil pa nos por kontrola delaster un detaye pa evita situashon nan manera a surgi djadumingu. E gran mayoria di lokual nos ta regla ta hasí for di un distansha i basá riba konfiansa den tur partido ku nos ta traha ku ne.
Nos ta desea di klarifika na pueblo di Kòrsou ku nos komo maneho di A’legria no ta kontra di kòntròl, mirando ku e seguridat di tur partisipante i tambe pueblo kantu di kaminda mester ta na promé luga.
E situashon ta lamentabel, pero manera nos tema ta indika, nos kier pone enfasis riba positivismo, i despues di a kumpli ku e nesesidat nan, nos a subi kaya ku bon ambiente, hopi smak i nos a duna tur ku nos tin pa pone un bon show pa pueblo.
Djamars próksimo dia di despedida nos lo hasi igual, pa asina sera karnaval 2024 ku AMOR, UNION, KARIÑO, FORSA i POSITIVISMO.
