Diamars, 29 di september, un grupo di studiante di enseñansa secundario profesional, entre 13 pa 19 aña, a pasa mita dia na La Cabana Beach Resort & Casino participando den e programa The World of Vacation Ownership.
E programa ta desaroya pa studiantenan di hoteleria y enseñansa profesional. E ta duna nan un bista tras di cortina di e industria di timeshare na Aruba y oportunidadnan di carera empresarial cu e ta ofrece.
E programa tabatin tres meta: mustra e variedad di carera den e industria di timeshare, stimula interes entre studiantenan pa enseñansa profesional y practico, y promove un mentalidad caminda tur dos banda ta gana, pa hobennan mira tanto e balor cu nan por aporta n’e industria, como loke e industria por ofrece nan tambe.
E nomber ta refleha e acercamento di e programa, cu ta laga studiantenan sumergi den e mundo di timeshare. Nan a ricibi guia pa conoce e industria, a topa cu profesionalnan hoben, a explora oportunidadnan real di carera, a traha riba retonan y haya un prome impresion di e mundo profesional.
Mescos cu aña pasa, e evento a tuma luga den e salon di gala di La Cabana Beach Resort, di 8:00 di mainta pa 1:00 di merdia. Na yegada, studiantenan a keda ricibi cu refresco y un wega pa asina ‘break the ice’ un poco. Despues, presidente di ATSA, Sulaika Kelly, y asistente di gerente general di e resort, Lillian Britten, a duna nan palabra di bon bini.
Despues di un puzzel den grupo, un wega di buskeda relaciona cu carera a introduci studiantenan na cuater funcion clave den e industria. Den e Vacation Ownership Challenge Lab, ekiponan a traha hunto pa duna e restaurant Islander Grill un diseño nobo. E programa a cera cu comentario y sugerencia, un foto di grupo, refresco, musica di DJ, saconan cu regalito y un cabina di fotografia di 360°.
Pa studiantenan di enseñansa secundario profesional, ta bira cada bes mas importante pa compronde e industria di hospitalidad, y particularmente e sector di timeshare.
Timeshare ta forma un parti importante di e industria turistico di Aruba, y ta ofrece trabou den benta, marketing, operacion y maneho di resort.
Sra. Kelly a gradici tur e socionan y participantenan cu a contribui n’e exito di e evento. Tambe el a gradici nan pa yuda desaroya un programa cu lo keda organisa atrobe den e añanan venidero.
Un gradecimento special ta bay na La Cabana Beach Resort & Casino, Aruba Center for Leadership Development Foundation, Conoce y DJ Eli. Arubiano a sostene e evento door di suministra saconan reutilisabel pa e regalitonan, y Flashback Aruba a suministra e cabina di fotografia di 360°.
