Dia 22 di Maart 2023 Grupo Uni a cumpli su di 45 aña di existencia y a celebré en grande den Renaissance Ballroom.
Na 1976 Organisacion pa Stimula Centronan di Bario na Aruba – OSTICEBA- a keda funda.
Na OSTICEBA tawata traha diferente trahadonan social cultural, manera Stanley Heinze, Amy Lasten, Maria Vrolijk, Kelvin Augustin, Lupita Gil, Stella Geerman, Glenda Gil y Lucia Kelly tawata director.
E trahadonan social cultural aki a traha den diferente bario na Aruba, hunto cu e habitantenan mes, na diferente proyectonan manera speelschooltjes, gruponan di Hubentud pa mucha- y hobennan, Gruponan di Hende Muhe, Gruponan di Adultonan Mayor, den Redaccion di un corant di bario, na construccion di un centro di bario y mucho mas, dunando guia, sosten, conseho, buscando fondo, aporta na locual e bario, e grupo, e boluntario mester y trahando hunto na e desaroyo di e barionan di Aruba.
OSTICEBA tawata stimula Centronan di Bario na Aruba, stimula e trabou di bario a base di e proceso di emancipacion pa empoderamento.
OSTICEBA a sali afor cu nos hendenan mes por, por hopi y kiko ta mihor cu nan mes ta haci e trabou y sigui haci e trabou pa nan bario y nan hendenan. Ken conoce nan bario mihor, cu no ta e habitantenan mes. E unico cos cu nan mester ta un comprension, un sosten, un guia, un conseho, un man pa nan mes por sigui.
Kiko kiermeen EMANCIPACION?
Emancipacion ta bin di e palabra latino Emancipare. E yiu homber ta sali for di e man di su tata y ta bay para riba su propio pianan, e ta bira independiente, autonomo.
Esaki a sosode tambe cu Esclavonan cu tawata propiedad di e doñonan, e shonnan. E esclavonan no a acepta mas, a rebeldia y lucha pa nan libertad y autonomia. Na 1863 a proclama e Emancipacion di tur e esclavonan.
Esaki ta sosodiendo tambe cu nos Adultonan Mayor, nos Grandinan.
Compara cu nos wela, bisawela, welo, bisawelo, awendia nos adultonan mayor kier ta economicamente y socialmente independiente. Nan ta bay forma parti di diferente grupo manera entre otro Fundacion Movimiento ta Bida, Grupo Uni, Grupo Bini Bini, Café feliz. Nan ta bay nan casino, cana den grupo, ta biaha, bay come afor cu amigo- y amiganan y mucho mas. Nos Adultonan Mayor ta emancipando.
Y tambe nos conoce Emancipacion di Hende Muhe.
Mundialmente e lucha di hende muhe a cuminsa den añanan 60.
Na Aruba ela cuminsa den añanan 70. A lanta diferente gruponan manera entre otro Steering Committee, gruponan di papia, Aloë, Anglo, Muhe Solidario – MuSo, Grupo di Servicio Hende Muhe SEPPA, Grupo di trabou pa asuntonan di hende muhe Simar, Fundacion Mamona.
Na Aruba e gruponan a lucha hopi pa entre otro elimina e leynan discriminatorio.
Algun di e leynan discriminatorio tawata:
Antes ora un hende muhe ta traha den gobierno y e casa, e tin cu kita di trabou.
Antes ora un hende muhe ta sali na estado, nan ta kite di trabou.
Antes den gobierno e hende homber casá ta gana mas cu e hende muhe, mientras nan dos ta haci e mesun trabou. Aki a lucha pa pago igual pa trabou igual.
Tur e leynan discriminatorio aki y mas a keda elimina. Danki na e lucha di e hendenan muhe.
Nos conoce tambe emancipacion di Trahadonan, Pueblonan y di Paisnan colonisa entre otro Aruba.
Dia 22 di maart 1978 riba un diaranson mainta, e prome encuentro cu e amanan di cas di Noord a tuma lugar den Centro di Bario Noord bou guia di Glenda Gil.
OSTICEBA kier a traha na emancipacion di hende, den e caso aki na emancipacion di hende muhe, e amanan di cas. Pa empodera nan.
Amanan di cas ta dedica hopi tempo na trabou di cas, yiu y nietonan y no ta traha tempo pa nan mes. Osticeba ta pensa cu amanan di cas tin derecho riba tempo liber pa nan mes, pa nan por sigui traha riba nan propio desaroyo, p’asina nan, na nan turno por sigui guia y sostene nan famia cu mas animo. Amanan di cas tin hopi talento, habilidadnan scondi y Aruba no ta haciendo uso debidamente di esaki.
A palabra cu cada dos siman ta bini hunto na Centro di Bario Noord di 9:00 di mainta te cu 12:00 di merdia. E grupo di amanan di cas a haya e nomber: GRUPO UNI.
Tin 6 señora cu desde inicio di e grupo ta den e grupo aki ainda. Nan ta: Emiliana Tromp, Titi Tromp, Juliana Gil, Chita Thode, Chita Faro y Cecilia Kelly. Pues e 6 señoranan aki tambe ta cumpli 45 aña hunto cu e grupo aki.
OSTICEBA a conseha e grupo pa no bira un fundacion of un asociacion, pero pa eligi cada aña dos miembro di e grupo como coordinadora pa 1 aña y pa forma diferente comisionnan.
Asina tur miembro ta traha y tur miembro ta haya e oportunidad pa siña coordina, dirigi reunion, traha relato y e peso di e trabou ta keda comparti entre tur.
E diferente comisionnan, cada un, ta prepara un actividad durante e aña, manera Carnaval, Dia di Hende Muhe, Dia di Himno y Bandera, Dia di Mama, Pasco grandi, bishita cierto lugarnan, bay den bus, anochi cultural pe bario, biahamento den exterior, celebracion di Aña di existencia, Mercado di Purga y mucho mucho mas.
Asina e grupo a traha tambe durante su 45 añanan di existencia cu ta bayendo hopi bon mes.
E prome coordinadoranan tawata Meechi Tromp y Modesta Tromp (q.e.p.d.).
OSTICEBA a pone riba papel pa e grupo, kiko ta e tareanan, trabounan di un coordinadora, di tesorero y di un comision. Y a siña nan con pa traha un programa anual a base di un inventarisacion di tur e idea- y deseonan di e miembronan mes di e grupo, con pa traha un relato anual, pa cobra un contribucion chikito y e grupo a eligi Emiliana Tromp como tesorero, kende a haci e trabou di tesoreria pa 39 aña largo sin perde ni un debchi.
Emiliana ta bisa:
“Mi a bira tesorera sin sa nada di tesorera, pero mi casa y yuinan a yuda mi. Mi a keda tesorera
39 aña largo, traha relato financiero despues di reunion, entrega relato financiero tur
fin di aña”.
Grupo Uni a haci un impacto den e districto di Noord cu nan teatro, baile, poesia, buki di remedinan di tera, un buki cu storianan di bida di diferente miembro, cu nan curashi, harimento, alegria, discusionnan y mucho mas.
E grupo aki a demostra un forza, un union, un determinacion pa sigui hunto, a siña traha den un grupo, denun comision, pa duna nan opinion, siña coordina un actividad, siña para dilanti y hiba palabra, a sera amistad bunita y a realisa cu ta dushi pa forma parti di un grupo y pa topa otro cada 2 siman pa pasa bon y te ainda ta pasando hopi bon hunto.
Despues di 4 aña, sosteniendo e grupo, OSTICEBA poco poco a laga e grupo los, pa motibo cu e grupo mes por a sigui independientemente. Nan a emancipa y te cu awe e grupo, Grupo Uni ta cumpli y ta celebra su di 45 aña di existencia.
Awor aki e grupo ta keda forma pa 30 hende muhe di Noord y nan tin un lista di espera.
OSTICEBA:
“E prome aña, e señoranan ta yega grupo y ta bisa, mi tin cu bay trempan, pasobra mi tin cu haci cuminda pa mi casa y yiunan.
E di dos aña, e señoranan ta yega grupo y ta bisa, ya mi a prepara e cuminda pa nan caba y nan mes tin cu sake.
Despues di 4 aña e señoranan ta yega grupo y ta bisa, awe ta mi dia liber, mi tin derecho riba dje, nan mes mira kiko nan ta cushina y come awe”.
E grupo a cuminsa keto, no ta papia, tin cu pidi cada un su opinion, tin ta bisa solamente, si, no, ta bon. Ta bisanan cu ta bon pa tin diferente opinion, esey ta bon pa e desaroyo di un grupo. Despues di algun aña, mester a pone ordo, basta discusion y mester a dirigi mas fuerte.
Un miembro:
“Den grupo mi a siña hopi cos, entre otro, di duna mi opinion, si cos ta bon si of no. Nos a yora, hari, discuti, pero semper a keda mes bon cu otro. Nos a biaha hopi, bishita gruponan di hende muhe, tanto den avion y den cruise ship entre otro nos a bishita Korsou, Bonaire, Costa Rica, Puerto Rico, Santo Domingo y St. Maarten.
Den pandemia nos no a keda sin bai reunion. Un miembro a ofrece nos su cas esta Shelly
Tromp, cual nos ta masha agradecido na dje.
Nos nomber esta Grupo Uni, un miembro cu ya a bai sosega esta Nini Ruiz a pense.
Nos himno a wordo traha door di Lilian Gil, yui di Juliana Gil y Michael Thode, yui di Chita Thode”.
E grupo aki, Grupo Uni a haci historia. Nan a papia riba nan, pero nan a haci un impacto den e districto di Noord y tambe na Aruba.
Nos tur ta orguyoso di GRUPO UNI!! Masha masha Pabien y sigui pa hopi aña mas hunto: GRUPO UNI.
Carmen Frans y Martina Chiquito
Coordinadornan di Grupo Uni 2022 – 2023
HIMNO di GRUPO UNI
(wijs di: E fecha glorioso)
Aki na Noord tin un Grupo, cu yama Grupo Uni
Nos tur ta topa otro, den Centro di Bario Noord
Tur diaranson mainta di nuebe pa diesdos
Nos tur ta uni hunto y asina diberti
Refrein:
Diaranson mainta, e dia di descanso
Pa nos amanan di cas, dje Parokia di Noord (2x)
Pasobra den nos bida, nos tur ta traha bon
Pa nos casa y yiunan, tur ora nos ta cla
Mainta te anochi, trabou no tin su fin
Den cushina tayonan sushi y cas ta reboltia
Refrein:
Diaranson mainta, e dia di descanso
Pa nos amanan di cas, dje Parokia di Noord (2x)
Blo diaranson mainta, nos tur ta descansa
Un poco aki den centro, den e grupo bon uni
Nos tur ta cla tur ora, pa nos por yuda Noord
Pasobra ‘n ta pornada, nos ta den Grupo Uni
Refrein:
Diaranson mainta, e dia di descanso
Pa nos amanan di cas, dje Parokia di Noord (2x)
