Prof. dr. Francio Guadeloupe, profesor extaordinario di Antropologia Publico di Relacionnan den Reino, a tene awe, diahuebs 12 di maart, su discurso inaugural na Universidad di Amsterdam (UvA). Guadeloupe a tene su discurso inaugural como titular di e catedra di Antropologia Publico di Relacion di Reino. Ministerio di Asuntonan Interno y Relacionnan den Reino (BZK) a crea e catedra aki na 2024.
Den su discurso inaugural, titula Estudionan Hulandes Caribense: Investigacion antropologico di Reino Hulandes, Guadeloupe a argumenta cu ta imposibel pa den siglo 21, considera e parti Caribense di Reino y Hulanda como mundonan separa cu cada un su propio cultura ‘nativo’ detayadamente defini. Esey pues lo desmenti con historia di bida di hende den Reino ta conecta cu otro riba nivel diario.
Migracion circular
Hopi persona di descendencia Caribense Hulandes ta forma parti di un migracion circular den Reino: nan ta biba, studia varios aña na Hulanda, ta regresa e islanan pa traha y contribui aya, y despues ta bolbe migra pa Hulanda, pasobra aya tin mas oportunidad. Psicologicamente e grupo aki ta keda mantene contacto cu ambos banda di oseano. Realidad di e migracion circular y coneccion psicologico aki no ta amplio conoci. Di otro banda tin hende tambe di descendencia Hulandes cu ta muda pa e islanan of ta permanece un parti di aña aya; nan tambe ta yama e parti Caribense di Reino nan cas.
Liñanan di investigacion
Pa e catedra, Guadeloupe a formula diferente liña di investigacion cu ta relaciona entre otro cu e coneccion cultural y intelectual Transatlantico y kico e coneccion ey ta nifica pa lasonan familiar y relacionnan (romantico).
Pelicula antropologico
Como parti di e Catedra, recientemente Guadeloupe a produci un pelicula antropologico, titula ‘Changa’ (‘Dos Cabes’). E pelicula ta hiba e espectador den un ritmo filosofico di wega di domino: con hende ta reacciona riba loke bida ta duna nan? Aki tambe e tema identidad ta bin prominentemente dilanti. ‘Changa’ a estrena januari ultimo na Aruba y Corsou. Lo sigui presentacionnan tambe na Hulanda y riba e otro islanan di e parti Caribense di Reino.
Comision di guia
E comision di guia pa e catedra, yama tambe ‘curatorium’, ta consisti di presidente Eileen Moyer, profesor antropologia di ecologia, salubridad y cambio di clima na Universidad di Amsterdam, Rachel Spronk, profesor antropologia di sexualidad y genero na Universidad di Amsterdam, Esther Captain, profesor special KNAW Impacto Intergeneracional di Sclavitud y Colonialismo na Universidad di Utrecht, y René Bagchus, Director di Relacionnan den Reino na e ministerio di BZK, como miembro consehero.
Pa Guadeloupe e discurso inaugural a sirbi oficialmente como aceptacion di su funcion como profesor extaordinario. Un discurso inaugural ta un evento importante cu hopi ceremonia. Manera ta custumber otro profesornan a presensia e discurso inaugural, tur bisti den toga.
Valioso
René Bagchus a felicita Guadeloupe na nomber di Directorado General Relacionnan den Reino di ministerio di BZK. ‘Mi ta contento cu e contribucion valioso di Francio Guadeloupe na ampliacion di conocemento Caribense y nos convivencia den Reino. Mi ta ansioso pa wak mas resultado di e investigacion di Francio. Mi ta convenci cu su investigacionnan y conocemento lo bay duna un contribucion na mas comprension y coneccion den nos Reino. Na e discurso inaugural, Director General di Relacionnan den Reino, Barbera Wolfensberger, tambe tabata presente.
Funcion cognitivo
E Directorado General a cuminsa dos aña pasa cu desaroyo di un funcion cognitivo di Relacionnan den Reino, pa basa e maneho relaciona cu e seis islanan Caribense miho riba conocemento y experencia Caribense. Pa e motibonan ey BZK a inicia dos catedra di Relacionnan den Reino, di cua Antropologia Publico di Relacionnan den Reino di Guadeloupe ta un di nan.
