Hende grandi ta bisa semper, esun cu no kier kere, lo mira, y esaki ta locual ta pasando rond mundo awor aki.
Tabata un siman largo cu henter mundo tabata ariba abao, si Israel ta bombardia Iran y Iran a contesta, cu si Merca lo ataca Iran, pasobra tanten tabatin papia cu Merca lo ataca, e avionnan mericano a bay tira bom te bini bek.
Ta hopi cos tin cu kier kita hende su bista for di realidad di bida y esey ta e binida di nos Senjor Cristo Hesus, cual ta algo cu nos tur mester ta prepara pe, pasobra Dios a duna y ta dunando keto bay e chens pa medio di Juan 3:16.
Antes nos tabata lesa di tempo trabahoso, tempo dificil y awor nos ta mira con e tempo a cambia.
Con hende a cambia,
Con hende a bira contra Dios,
Con hende a fiha leynan contra palabra di Dios,
Pa asina hende por continua den nan inmoralidad y nan malicia, cual awendia ta wordo celebra,
pasobra hende ta yama malo bon y bon malo.
No laga nos purba tapa solo cu un dede, Covid tabata un pester riba henter mundo.Y hende a haci politica cune pa lubida cu Cristo Hesus a avisa cu e cosnan ey lo bini.
Calentamento Global ta otro senjal di Dios pa mundo henter tene cuenta y realisa cu su palabra ta cumpliendo y binida di Hesus ta na caminda ( 2 Pedr0 3:7-11) y cu mundo henter mester arepenti.
E aumento di perversidad,
E aumento di bruheria,
E aumento di malicia,
E aumento di traicion y matamento,
E aumento di violencia tur ta para scirbi, cu esaki lo ta principio di dolor di parto.
Wak cuanto hende tin problema di salud mental pa preocupacion di bida, cual ta para scirbi den Lucas 21:34. Wak cuanto hamber riba mundo,wak cuanto hende tin cu huy for di nan propio pais, lagando nan cas, pasobra e pais a bira dificil pa biba door di mal gobierno.
Tin biaha nos tin cu pensa cuanto hende cu tabatin hypotheek riba nan cas a bandona nan pais bay lagando debe atras, kiermen chaos financiero manera Bijbel ta bisa tambe ta sosode.
Tur locual ta abominacion a aumenta pasobra diabel kier goberna, y e palabra di Dios ta bisa cu nos lo bay wak movecion di maldad riba e mundo sin ningun clase di escrupulo, y esey ta locual nos ta mirando.
Tanto temblor, tanto tsunami, tanto orkaan,tur esaki nan ta para scirbi, y te ainda Bijbel ta bisa nos cu Cristo Hesus lo bini manera un ladron den anochi.
Nos ta bibando den tempo manera di Noe y tempo cu Lot mester a sali for di Sodoma y Gommora,
Pasobra cada dia situacion ta empeora en bes di drecha.
Falta di respet a aumenta drasticamente, y hende a perde berguensa pa ganja riba otro, pa lanta falso testimonio, pa kibra otro pensando cu asina nan ta crece, y bira importante.
Ma ora e cosnan aki cuminsa tuma lugar,wak ariba y lanta boso cabes, pasobra boso redencion ta yegando cerca.( Lucas 21:28).
No ta un wega, pero un gran berdad, pero e enemigo ta trahando overtime, ta desvia, y distrai hende su bista for di riba Cristo Hesus, haciendo hende ciego cu placer di mundo, y asina nan lo keda atras ora Cristo Hesus bini.
Awor ta e momento pa nos hala mas cerca Dios, pasobra CrIsto Hesus ta e unico caminda di berdad y e bida.
Ta tempo pa nos entrega nos bida completo na Cristo Hesus.
Sinceramente, Pastor Marcel Balootje
