Recientemente Aruba Excellence Foundation (A.E.F.) tabata tin e honor pa facilita e team di maneho di reparticion di cuminda, esta e voedingsassistent di Horacio Oduber Hospital (H.O.H.) cu e curso di Servicio Excelente cu Zjeito.
E meta ta pa tur miembro di team eleva nan habilidad pa brinda servicio profecional cu Zjeito na cada pashient y cu empatia.
Durante di e 4 dia di training a enfoca cu aki na Aruba emberdad nos tin un manera unico di brinda servicio den tur area di hospitalidad, cu por wordo implementa incluso den e area di cuido.
Pa cada participante tin un mihor comprendemento tocante e caracterista unico aki di Servicio Excelente cu Zjeito. A trata prome e punto di kico ta haci nos isla e ‘One Happy Island’, kico ta nifica ser hospitalario y con por transmiti esaki den e sector di cuido ora ta trata servicio personalisa na cada pashient den hospital na momento di reparticion di cuminda.
A analisa con actitud tambe ta hunga un rol den e forma di brinda servicio. A enfatisa cu comunicacion excelente ta e yabi pa asina e servicio bai ‘smooth’ y pa por yuda minimisa erornan cometi pa falta di comunicacion.
Tambe a trata e parti con pa anda cu keho cu algun tipsnan balioso cu cada persona lo por aplica na momento cu tin cu anda cu situacionnan dificil.
Durante di e training e miembronan di e team di voedingsassistenten tambe a haya oportunidad pa haci algun rollenspel y pone den practica loke cu nan a siña durante di e sesionnan presenta.
Na final cada participante cu a participa activamente durante tur session a ricibi un Certificado di Participacion di Servicio Excelente cu tin un validez di 2 aña.
Aruba Excellence Foundation a wordo institui door di Aruba Tourism Authority na juni 2018 y ta e fundacion encarga pa entre otro ehecuta e Aruba Certification Program (A.C.P.) como tambe e programa di Happy Information Officers (H.I.O.). Meta principal di e fundacion ta pa sigui desaroya y implementa A.C.P. y H.I.O. como tambe otro programanan specialmente diseña pa certifica personanan cu ta traha den sector di servicio y hospitalidad, p’asina percura cu e nivel di servicio excelente di Aruba ya bon conoci, por keda riba un nivel halto.
