Diahuebs anochi miembronan di CAPA (Cooperativa di Ahorro y Prestamo Aruba) a eligi lidernan nobo pa dirigi e Comision di Supervision. E nombernan ta Richard Lopez, Gento Gil, Mary Geerman, Daniela Martijn y Eveline Tromp. Tur ta lidernan bon forma, cu bon estudio y cla pa tuma rienda den CAPA.
Cu e cambionan di stutonan di dia 25 november 2024, no ta existi directiva mas y un Comision di Supervision + un directorado nobo la bay dirigi CAPA.
E resultado ta hopi bon ya cu e miembronan di directiva anterior, a keda grandemente rechasa pa miembronan di CAPA. Un tremendo siñal pa motibo di hopi critica ariba nan pa motibo di malmaneho y un ladronicia di F 382.000,= cual te ainda no tin claridad.
Nos ta bibando den un era, awe den siglo 21, unda tur hende di bon boluntad ta papia di Good Governance, pero e maneho di e directiva tabata lew di esaki.
Miembronan di CAPA a comprende tur cos y pesey e enorme RECHASO di miembronan di CAPA na e directiva ey. Un berguensa pa esnan cu a hiba un maneho y despues keda rechasa totalmente. Awor Banco Central lo mester aproba e lidernan nobo pa nan por drenta den funcion. Nos speransa ta cu pronto esaki ta sosode.
Kico ta Cooperativa y con Cooperativa a lanta.
Un cooperativa ta un asosacion di hendenan, kendenan pa un o mas motibu ta lanta e asosacion pa coopera cu otro y busca bentahanan comun. E forma di coopera aki, ta un organisacion social y di solidaridad, habri pa miembronan por coopera cu otro, unda nomber, adres, telefoon y awendia e formanan digital mester ta disponibel na tur miembro.
Esaki pa coopera y comunica cu otro, ora ta necesario. Pa e motibu aki articulo 34 di nos statutonan. Awor mester percura pa tur miembro ta ricibi e Statutonan nobo aserca e Reglamentonan Interno=Guia adapta.
Formacion ariba Cooperativismo ta un di e 5 metanan di CAPA.
Pues mester cambia e rumbo di pensamento di dirigente pa uno social y di solidaridad. E pensamento neo-liberal no por prevalece den cooperativismo.
Tur esaki ta un proceso cu ta tuma tempo. Despues di hopi añanan sin formacion, esaki mester ta un prioridad di e futuro dirigentenan, pa nos hiba CAPA dilanti unda e pensamento ariba e partinan social y di solidaridad ta ricibi un lugar importante.
Final di dia, varios di miembronan di comision 11 na 1979, tabata na fundacion di CAPA.
Nos sa cu CAPA a wordo lanta pa combati e inhusticia social cometi dor di e banconan Comercial cu interes halto ora di prestamo y interes abao ora di spaar.
Miembronan di comision 11, ta manda un caluroso Pabien na tur Miembro di CAPA:
Prome “Masha Pabien cu nos lidernan nobo”.
Di dos, Nacionan Uni a proclama 2025, como aña di Cooperativismo.
Pa finalisa, ban duna e lidernan nobo tur nos cooperacion pa hiba CAPA dilanti.
