No tin nada mas dushi, nada mas bunita,cu ora nos como hende ta trata otro bon, pasobra esey ta nifica cu nos ta respeta creacion di Dios, no ta importa rasa, of color, tur hende merece di wordo trata bon, respeta, y pa nan por sinti cu nan tambe ta conta.
Respet pa otro ta demostra educacion, e ta demostra positivismo, e ta demostra amor, e ta cultiva amistad, e ta demostra cu Dios ta biba den nos curason.
Dios a priminti cu nunca E lo laga nos bandona, ni tampoco desampara, pasobra E ta stima nos.
No laga di haci bon y di comparti cu otro, pasobra sorto di sacrificionan asina ta agrada Dios.( Hebreonan 13:16).
E ora ey palabra di Senjor a yega na Zacarias, bisando: Asina e Senjor di ehercitonan a bisa; Administra husticia berdadero, y cada un mustra carinjo y compasion na su ruman.y no oprimi, e buida y e werfano, e stranhero ni e hende pober, y no planta maldad den boso curason contra otro.
Si riba e mundo aki no tabatin inhusticia, maldad, guera,corupcion,guerilla, droga, terorismo,competencia inhustu,politica dudoso.gobernacion desastroso, dictadura y comunismo y hende sin consenshi cu ta enrikece nan mes riba lomba di otro, tur caminda lo tin cuminda y panja pa tur hende.
Pasobra tin hopi cosecha ta wordo tira afo pa e preis riba mercado keda bon, mientras cu djis den otro pais, tin hende ta muri di hamber y sed, pero toch nada ta wordo duna na nan.
Aki nan nos por mira, con leu golosidad pa placa, y duresa di curason di hende contra hende por yega.
Cada biaha cu nos haci bon na otro ta na Dios nos a hacie. ( Mateo 25:34-40).
Sea carinjoso cu otro, misericordioso,pordonando otro, mescos cu Dios den Cristo tambe a pordona boso.(Efesionan 4:32).
Esun cu tene misericordia di hende pober ta fia Senjor, y E lo page bek pa su bon obra.( Proverbionan 19:17).
Asina anto, mientras nos tin oportunidad, laga nos haci bon na tur hende, y specialmente na esnan cu ta di e famia di fe.( Galationan 6:10).
Ta un honor pa sirbi hende, ta un honor pa yuda hende, ta un honor pa yuda otro den nan dolor y necesidad.Pasobra palabra di Dios ta bisa pa stima otro manera bo mes.
Laga boso lus briya dilanti di hende di tal manera,cu nan por mira boso bon obranan y glorifica boso Tata cu ta den cielo.( Mateo 5:16).
Nos tur ta yama pa haci bon obra , no solamente den un temporada, pero tur momento, pasobra e palabra di Dios ta bisa; Pasobra nos ta e obra di Su man, crea den Cristo Hesus, pa bon obranan, cual Dios a prepara di antemano, pa nos cana den nan.( Efesionan 1;10).
Boso tur sea di acuerdo cu otro, teniendo compasion cu otro, stimando manera ruman, y sea misericordioso y humilde den spirito,no pagando malo cu malo of insulto cu insulto,ma mas bien dunando un bendicion, pasobra boso a wordo yama pa e proposito aki, pa boso por hereda un bendicion. ( 1Pedro 3:8-9).
Esun cu ta generoso lo ta bendiciona, pasobra e ta comparti su pan cu esun cu ta pober. ( Proverbionan 22;9).
Ma ken cu tin biennan di mundo,y ta mira su ruman den necesidad y ta sera su curason pe, ta con e amor di Dios ta permanece den dje? Yiu chikitonan no laga nos stima cu palabra ni cu lenga ma cu hecho y berdad.Na esaki nos lo sa cu nos ta di e berdad,y lo sigura nos curason dilanti di dj’E. ( 1 Juan 3:17-19),
Sinceramente, Pastor Marcel Balootje
