Esun cu haci bon ta den obediencia na Dios y esun cu ta haci malo ta den desobediencia na Dios.
Cada ken lo ricibo nan pago segun locual nan a haci , pasobra Dios ta mira tur cos y Dios sa tur cos.
E no ta bay destrui e husto hunto cu e malbado, pero e ta saca e husto prome despues e ta destrui e malbado, prueba di esey e a demostra den e historia di Noe, (Genesis capitulo 6, 7 y 8) con Dios a manda Noe traha un Arca pasobra e ta bay destrui e mundo malbado den e tempo ey cu diluvio (awacero pisa) y Noe a haci tur locual Senjor a bise, y asina e cu su famia a wordo salba.
Den otro caso nos tur sa e historia di Sodoma Y Gomora, e dos cuidadnan caminda maldad tabata tuma lugar ( Genesis 13:13), y nos ta corda con Abraham a intercede pa Sodoma ( Genesis 18;16-33) y Dios a bisa si e hanja un hende husto lo e pordona e cuidad.
Y den Genesis 19 ta mustra nos cu ta solamente Lot tabata e persona husto den e cuidad, y Dios a manda dos angel pa busca Lot. Pero Lot y su famia no tabata cla pa sali for di Sodoma y Gomorra, y e angel mester a cohe nan na nan man y saca nan pafor , y asina mes ora nan tabata pafo di e cuidadnan na e stad chikito Zoar, y candela a cuminsa yobe for di cielo, e casa di Lot a bira wak patras y a bira un pilar di salo.
E casa di Lot pa motibo cu e ta hunto cu Lot misericordia di Dios a cay riba dje, pero como cu su curason tabata pega na e bida mundano di Sodoma y Gomora, como cu e no kier a bay laga locual cu e tabatin e a desobedece Dios, y a perde su bida, pasobra e no kier a laga los y sigi bay dilanti sin wak patras.
Tin hopi hende kier Cristo Hesus den nan curason, pero no ta dispuesto, pa bandona e sistema di mundo, pero aki nan a keda proba cu hende no por sirbi dos Dios.
Palabra di Dios ta sigi mustra nos cu Lot su dos yuinan tamhe a sali hunto cune, pero nan tambe tabatin e spirito di Sodoma y Gomora riba nan y saliendo for di e cuidad toch e malisia a keda riba nan.
Pesey ta para scirbi den 1 Corintionan 6:9-10-11: Acaso boso no sa cu e inhustunan lo no hereda e reino di Dios. No laga nan ganja boso, ni fornicado, ni adorado di Dios falso,ni adultero,ni esnan afemina,ni homosexual, ni ladron,ni esnan golos pa placa,ni burache,ni blasfemado,ni estafador,lo no hereda e reino di Dios.
Asina algun di boso tabata, ma boso a wordo laba ma boso a wordo santifica, ma boso a wordo hustifica, den e nomber di Senjor Hesus Cristo y den e Spirito di nos Dios.
Pesey pa esnan cu sa di haci bon, y no ta hacie, pa esaki ta pica. ( Santiago 4:17).
Ay di esnan cu ta yama loke ta malo , bon y loke ta bon malo, loke ta scuridad lus, y loke ta lus scuridad, loke ta marga dushi, y loke ta dushi marga.( Efesionan 5:20).
Ora nos ta participa den maldad, y nos ta bon na altura di esey, nos ta falta termor di Dios, nos a cay den desobediencia, y nos mester arepenti y confesa na Dios, pa Dios por tene misericordia di nos.
Haci bon y no coopera cu maldad.
Sinceramente, Pastor Marcel Balootje
