Hopi hende ta kere ta wega, tin hopi grupo anticristo cu ta lanta contra Dios y Su palabra.
Tin hopi pais caminda hende ta ninga di reconoce Cristo Hesus como Senjor y Salbador.
Tin hende ta tuma esnan cu ta predica e evangelio di Dios, e conocido hendenan di misa como enemigo, pasobra nan no kier arepenti y sali for di scuridad, y entrega nan bida na Cristo Hesus.
Si nos kier papia di persigicion, awor esey a cuminsa hopi tempo pasa, pasobra Cristian ta wordo mata tur dia pa motibo di nan Fe y e palabra cu nan ta predica, pasobra hende no kier scucha e berdad.
E situacion ta tenso pasobra manera Juan Bautista a reprende Herodes,pa motibo di su inmoralidad cual e tabata biba den dje, asina tambe awendia, nos no por sconde pica bao di protocol pa complace cu hende y mantene amistad cu mundo , y a causa di esey nos ta bira enemigo di Dios.(Santiago 4:4).
Pica ta pica, no tin otro manera pa bisa, si pica ta wordo haci door di un rico of un pober, door di un mandatario of un cria di cas, door di un rey of un esclavo, e ta keda mesun pica, y si no bini arepentimento e alma ey lo bay perdi.
Serca Dios no tin hende favorito.
Si un mentira wordo papia den reunion di mas alto nivel , of e wordo papia riba caya, e ta keda un mentira, y e persona cu a papia e mentira , ta un mentiroso, no ta importa ken e ta.
Si falta di pordon, ta wordo practica door di mayor, nan sa cu nan yiunan tambe lo bin haci mesun cos, pasobra ta esey nan a mira y sinja serca nan mayor.
Pero Hebreonan 12:14 ta bisa algo cu nos tin di tene bon cuenta cune pa nos no cay den trampa di diabel:
Aspira pa tin pas cu tur hende,y santificacion, sin cual ningun hende lo mira Senjor.
Haci tur bo esfuerso, pa bo biba na pas cu tur hende, sin pleito,sin rencor, sin tene hende na curason,
Esey ta exigencia di Dios, un exigencia cu ta pone nos tur na prueba, pasobra hasta esnan cu no kier tende di bo, bo mester biba na pas cu nan.
Manera e palabra ta bisa: Stima bo enemigonan y haci oracion pa nan.( Mateo 5:44).
Caminda nan no kier tende e evangelio, no tuma nan na malo, haci oracion pa nan, ora bo topa cu hende cu no kier reconoce Dios, sigi haci oracion pa nan, ora bo topa cu hende cu kier haci cambio den nan naturalesa, y ta resisti e Spirito di Dios, haci hopi oracion pa nan.
Pasobra e plan di e diabel ta pa trece pleito y confusion, lanta grupo contra otro,pa haci tur locual ta posibel pa hende no tin pas cu otro.
Y ta dificil pa bo bisa bo ta den santidad, si bo tin hende wanta na curason, of bo sa cu nan no kier mirabo, pero toch bo tin cu samina bo mes y obedece Dios.
Santidad ta un evidencia di Salbacion.
Pas ta un evidencia cu nos ta disipulo di Cristo Hesus.
Pas ta un fruta di Spirito Santo.
Senjor su Palabra no ta cambia,corda bon kico Cristo Hesus a bisa: Ami ta e caminda e berdad y e bida,ni un hende no por yega serca e Tata sino ta pa medio di Mi.
Awor e palabra di Dios ta bolbe mustra cu sin pas y sin santidad ningun hende lo mira Senjor.
Tene bon cuenta.
Sinceramente, Pastor Marcel Balootje.
