Crecemento ta bin cu diferente pregunta: ken mi ta? Kico ta haci mi diferente? Pakico mi ta reacciona di e manera aki? Con mi decisionnan ta afecta mi experiencianan?
Esaki ta algun di e preguntanan cu hobennan lo explora durante e tayer interactivo “IN PROGRES” organisa pa Heart-Centered Leadership Foundation (HCLF)
Ser un hoben ta mucho mas cu crecemento. E ta un tempo pa descubri identidad, nabega amistad, maneha emocion, y siña con pa responde na situacionnan cu no ta tur biaha ta bay manera tabata planea. Mientras e experiencianan aki ta un parti natural di crece, no ta tur biaha hobennan ta haya e oportunidad pa para keto, reflexiona y compronde nan mes miho.
E tayer “IN PROGRESS” tin como meta pa crea e oportunidad aki.
Participantenan lo explora kico ta haci nan unico, reconoce forsanan personal, y reflexiona riba con nan escogencia y reaccion ta influencia nan experiencia diario.
“Un hoben por sinti cu ta wordo spera di dje cu e sa ken e ta, kico e kier, y con e ta maneha tur cos rond di dje. Pero e realidad ta cu crecemento y formacion den bira ken bo ta, ta un proceso. Nos kier duna hobennan e espacio unda nan por explora e preguntanan aki, reconoce nan forsanan y compronde cu nan no mester sa tur cos caba.” Deanna Lampkin, coordinadora di programanan hubenil pa HCLF ta comparti.
E tayer aki ta un oportunidad pa hobennan sali pafo di nan rutinanan diario, conecta cu nan mesun experiencia y haya perspectiva nobo den un ambiente cu ta apoya nan.
IN PROGRESS ta specialmente pa hobennan entre 13 – 16 aña. E tayer lo tuma luga riba diadomingo, 29 november 2026 di 2:30 pm – 4:30 pm na Teresita Center. Contribucion ta Afl. 25,-
Registracion ta habri pero cupo ta limita. Pa mas informacion tocante registracion y participacion por tuma contacto cu HCLF door di manda un mensahe di Whatsapp na 5841211.
Tocante HCLF
HCLF ta un fundacion cu a keda estableci na 2008 cu e meta pa inspira y empodera hobennan di Aruba. Desde 2012, HCLF ta traha di serca cu schoolnan, centro di bario, y otro organisacionnan pa ofrece diferente tayer, actividad y programanan impactante unda hobennan ta sera conoce nan mes miho y traha riba nan desaroyo personal y profesional.
