Flohera no ta bon bini, ningun caminda, flohera ta ruman di pobresa, primu di bagamundo,cu hopi biaha ta hiba na un bida sin respet, y ta pone hende keda keha, murmura, y no ta ripara cu nan mes no ta haci ningun esfuerso pa bay dilanti.
Dios ta stima hende cu ta disponibel, no ta importa color, rasa , pero importante ta bo dedicacion na Dios, pasobra si bo no tin conocemento, Dios mes lo yuda, ora bo mustra cu bo ta disponibel.
David tabata un hoben, sin experiencia militar, wardado di carne, pero e a mustra di ta disponibel pa bringa contra Goliat, pasobra e no tabata floho, e a train contra leon y beer, y awor ta enfrenta un gigante den nomber di Dios di ehercitonan y su fieldad, firmesa y disponibilidad a pone derota e gigante Goliat.
No laga pa majan locual bo por haci awe, no drumi kere cu nada ta bini serca bo, lanta riba , busca cara di Dios, esforsa bo mes y sea balente, pone bo confiansa den Dios y Dios lo habri porta pa bo, y hopi hende lo puntra con bo a yega, y abo por contesta cu un smile grandi yena cu seguridad riba bo cara bisando pasobra mi a pidi Dios.
Den Juan 15:4-5 ta para scirbi: Keda den Mi, y Ami den boso. Mescos cu e rama no por carga fruta di su mes,si e no keda den e mata di wijndruif,asina boso tampoco,si boso no keda den Mi.Ami ta e mata di wijndruif,boso ta e ramanan, esun cu keda den Mi,e Ami den dje,esey lo duna hopi fruta,pasobra separa dimi boso no por haci nada.
Ta hopi hende kier pretende cu nan por logra cosnan sin Dios, nan ta hasta separa nan trabao for di Dios,y nan ta keda malcontento ora tin otro cu si ta pone Dios na prome lugar den tur cos.
Y nan ta lubida cu Dios ta envolvi den tur cos den nos bida, pasobra Dios ta nos rosea, y si nos rosea wordo kita, nos ta muri, pesey no ta nada bon pa nos tin karakter orguyoso y arogante, pasobra Dios no ta aprecia esey.
Ningun hende por ta independiente di Dios, tampoco nos trabao, of posicion por haci nos menos
dependiente di Dios.Aki nan nos por mira con leu trampa di diabel por avansa
Dios ta contento cu cumplidornan di su Palabra, y no sea solamente tendedo cu ta ganja nan mes.(Santago 1:22).
No laga e enemigo desvia bo y asina bo por kita for di e proposito cual Dios a yamabo, y no laga ningun hende, ni nada strobabo di sirbi Dios, no pone nada ni ningun hende mas halto cu Dios den bo bida, pasobra mayan ora bo tin mester di Dios, hende no por yuda bo, ta Dios mes bo mester.
Ta solamene Dios por duna pas perfecto . (Isaias 26: 3).
Salud y prosperidad ta bini di Dios.(3 Juan versiculo 2).
Den Daniel capitulo 6 ta keda demostra cu no ta importa con halto bo posicion di trabao por ta, pero si bo mantene Dios na prome lugar , Dios lo libra bo di tur problema, pasobra bo ta constante, firme y fiel.( Daniel 6:19-22).
Ora nos ta sirbi Dios, no tin cuenta di grandi ni chikito, sabi, rico of pober, pero ta disponibilidad, y constancia ta conta, nos intimidad cu Dios, ta haci Dios contento, y nos confiansa den Dios ta pone Dios broma cu nos ( Job 1:8).
Awe laga nos tuma tempo, pa ta disponibel pa nos Dios.
Sinceramente, Pastor Marcel Balootje
