Cada hende na mundo ta nace di un pareha, di homber cu muher. Un famia ta wordo lanta pa medio di tata y mama. Y bo mes, di unda bo ta kere cu ba bini? Den Bijbel Genesis 2: 4-24, na principio di creacion, Dios Tata a traha homber y muher, nan nomber ta Adam y Eva. Dios Tata a traha homber y muher, pa procreacion humano. Tambe nos por lesa den Bijbel Marco 10: 6 – 9, na unda Cristo Hesus ta bisa: “Na principio di creacion Dios a traha homber y muher, p’esey e homber lo laga su tata y su mama pa e uni cu su muher y nan dos lo bira un solo curpa.” Akinan Dios ta uni e homber y e muher den enlaso Matrimonial, pa nan haci nan relacion sexual pa nan lanta famia. Den e union aki, di homber y muher, e yiunan ta sigi e ehempelnan di nan tata y di nan mama. Dia cu e yiunan bira grandi, nan tambe ta casa pa lanta famia, mescos cu nan tata y nan mama. Awor, ta di unda ta bini cu homber cu homber y muher cu muher y transgenero, kier e union di casamento? Den Bijbel Genesis 19: 1 – 23, pakiko Dios Tata a destrui y a caba cu tur e habitantenan den e ciudadnan grandi di Sodoma y Gomorra cu candela y azufre? Pasobra e ciudadnan di Sodoma y Gomorra tabata habita pa homosexualnan, lesbiananan y di tur clase di relacionnan sexual inmoral y deshonesto. Den Bijbel Romanonan 1: 24 – 32, na unda Dios Tata a destrui y a caba cu tur e habitantenan di Sodoma y Gomorra, pa motibo di nan mal pasionnan cu e diabel a hinka den nan mente, den deseonan impuro. Di manera cu nan a deshonra nan mes curpa, nan a cambia e berdad di Dios pa mentira y nan a honra y adora idolonan, na lugar di Dios Creador. Nan muhernan a cambia tradicion natural pa esun contra naturalesa. Mescos tambe, hombernan a kita tradicion natural cu muhernan y a inflama nan mes den pasion cu hombernan. Hombernan ta comete deshonestidad cu hombernan. Asina nan ta haya den nan mes, e castigo mereci pa nan errornan. Nan ta yen di tur sorto di inhusticia. Nan ta haya, cu no ta bale la pena pa reconoce Dios. Maske cu nan ta reconoce e sentencianan di Dios, nan ta obra den maldad y p’esey nan ta merece morto. Nan mes ta haciele concientemente y nan ta aplaudi na esnan cu ta hacie tambe. Nan ta stroba Dios Su procreacion humano door di nan inmoralidad sexual y deshonesto, den oral y anal sex. Den Bijbel Genesis 19: 1 – 23, na unda tur e hombernan (homosexualnan) di Sodoma a rondona e cas di Lot y nan a bisa Lot : “Na unda e dos hombernan ta, cu a yega bo cas anochi? Sacanan afo, pa nos tene relacion sexual cu nan.” Lot a bisanan : “Mi ta roga boso mi rumannan, no comete tal maldad aki.” Aki nos por comprende, cu e dos hombernan cu a bin na cas di Lot, nan tabata Angelnan di Dios, cu a bin pa trece husticia y castigo y Dios a castiga e habitantenan inesperadamente. Akinan nos por mira, con grandi e ofensanan y e pikanan di inmoralidad y deshonesto tabata ta, cu Dios Tata a kita bida di tur e habitantenan. Bijbel Levitico 20: 13 : “E homber cu drumi cu un homber manera cu ta drumi cu un muher, nan dos ta comete actonan repugnante, nan dos lo muri y nan sanger lo cay riba nan.” Bijbel Levitico 18: 22 : “Lo bo no tin relacion sexual cu un homber manera cu sa haci cu un muher, esey ta algo abominabel.” P’esey, no bini cu e leynan cu ta bini for di abismonan di fierno, pa desvia hendenan den perdicion di condenacion mescos cu Sodoma y Gomorra. Haci mescos cu e president di Merca Donald Trump a haci. E’l a bin cu un Ley nobo den e Constitucion di Merca, cu lo bai tin solamente dos gender di hende, esta homber y muher.
Scirbi pa Seferino Tromp
