Aruba a enfrenta un caida politico fuerte, y segun Hendrik Tevreden, lider di fraccion di MEP, esaki no tabata inevitabel mirando con Raiz a trata e situacion aki.
Segun su declaracion, e situacion cu a yega na caida di Gabinete Wever-Croes II ta un resultado di un plataforma politico cu a perde su rumbo, poniendo probecho personal y egoismo dilanti di e bienestar di e pueblo Arubano.
“Nos ta lamenta profundamente cu e acuerdo di gobernacion a wordo kibra y cu corupcion a haya un luga den nos sistema. Integridad ta leu fo’i cas pa Raiz,” a expresa Tevreden cu frustracion.
Dialuna mainta, Gabinete Wever-Croes II a presenta su retiro, un decision cu a pone Aruba den un situacion instabil y cu a crea momentonan hopi dificil pa e pais. Maske cu Aruba ta den crecemento economico y tin un presupuesto surplus pa gobierno.
Tevreden a enfatisa cu, den un situacion asina critico entre e partnernan, no tabatin otro opcion sino bay over na eleccion cu ta planea pa dia 6 di december. Den gobernacion bo mester tin confiansa den otro, y cu esaki tur confiansa den Raiz a bay perdi. “Eleccion aworaki ta un paso forsoso, pasobra e gobernacion aki no por a sigui pa e rumbo cu el a tuma,” a agrega e lider di fraccion.
Hendrik Tevreden a comparti c’un traicion di e forma aki tabata e punto clave den e caida di gobierno. Tur esaki a cuminsa na matrimonio di mesun sexo, un di e temanan mas controversial di ultimo tempo. Pa motibo cu Vrolijk a cambia su voto pa bay contra e ley, tur e saga aki a cuminsa.
Misha Raymond, un figura cu claramente no tabata conforme pa motibo di e forma con Edgard Vrolijk a maneha e reunion relaciona cu matrimonio di mesun sexo, a keda cu un resentimento cu, segun Tevreden, a amplifica e conflictonan politico.
Hendrik Tevreden ta lamenta e caida di gobierno y ta spera pero ta positivo cu segun tur rapport ta indica, cu a Aruba a wordo seriamente goberna pa gabinete Wever- Croes. Nos ta optimista cu e eleccion na caminda lo duna Aruba un oportunidad nobo pa scoge pa hendenan cu ta para pa e bienestar di pueblo y pa un futuro mas prospero pa nos pais.
