E candidato Hendrik Tevreden di Partido MEP ta expresa su gradecimento profundo na comunidad di Aruba despues di e resultado di e Eleccion Parlamentario cu a tuma luga diabierna dia 6 di december.
Den un mensahe yen di gratitud y reflexion, Tevreden a destaca e papel di su team, su famia y mas importante, e confiansa cu e pueblo a pone den dje.
“Awe mi a lanta agradecido, na Dios, mi casa, mi yiunan y henter e team cu a yuda mi den e campaña aki. Un gradicimento special na cada un di esnan cu a marca number 6 dia 6!”, Tevreden a bisa.
E resultado di eleccion a wordo califica como historico, den hopi manera, caracterisa pa e diversidad den e panorama politico di Aruba.
Segun Tevreden, partidonan cu a pensa cu nan lo bolbe a disparce, y partidonan ‘nobo’ a aparece riba e panorama politico. Sinembargo, MEP a permanece grandi y presente como un contienda politico.
“Despues cu MEP a goberna dos termino consecutivo y mirando e resultado, nos por bisa cu tin aprobacion pa con nos a goberna, pero sigur tin espacio pa mehoracion,” el a agrega. Tambe a menciona cu, aunke kisas por tin un reconteo aki aya, no necesariamente esaki lo cambia e resultado.
Hendrik Tevreden a probecha e oportunidad pa felicita Conseho Electoral pa nan tremendo trabao, esfuerso y profesionalismo den e proceso democratico Arubano.
El a termina cu un reflexion yen di fe y speransa: “E tempo di Dios ta perfecto y e bunita ta, cu Dios ta keda doño di tempo. Aruba danki, mi stima bo”.
Hendrik Tevreden ta gradici cada persona cu a participa den e proceso democratico y ta reafirma su compromiso pa e progreso y bienestar di Aruba.
