Rumannan, awe nos por lesa den e palabra di Dios, cu e mundo cu nos ta biba riba dje y tur loke cu nos wowo ta wak ta di Dios. Dios den su inmenso amor a crea, a diseña y a hasta duna bida na su creacion. Mira cuanto cos Dios a crea pa haci nos contento, mira ki bunita naturalesa, mira ki maraviyoso e mundo di bestia y sin lubida e maraviya di un cielo yena cu nubia y strea. El a crea un luna pa nos por tin luz anochi y e solo pa nos por tin claridad y calor durante di dia. Ta p’esey mes nos mester lanta tur dia pa gradici nos Creador, yam’E danki pa tur cos cu El a haci y ta haciendo pa nos. No ban cay den e engaño di e malvado pensando cu e creacion tin mas poder cu e Creador of cu e creacion por manda of insulta e Creador. Laga nos tin un amor berdadero y profundo pa Tata di nos Señor Hesus cu ta Esun cu a crea tur cos.
Oracion: Tata awe nos ta yama Bo danki pa bo amor incondicional cu nos por wak den Bo creacion. Danki Tata den e nomber di Hesus. Amen.
