ORANJESTAD – 4 di october 2021: Herbert Horne a traha henter su bida cu MetaCorp. El a wordo emplea pa e fundado, Shon Eddy de Veer y a traha te dia cu el a baha cu pensioen y tabata e ultimo empleado di Shon Eddy. MetaCorp ta e empresa di mas bieu di Aruba y ta existi mas cu 100 aña.
Horne, manera tabata yam’e cariñosamente, no ta djis un pensionado di e compania pasobra su storia ta identifica cu e cultura di MetaCorp, den cual empleadonan ta forma un carera y ta crece den e compania. Horne a cuminsa traha eynan cu 18 aña di edad y a sigui te na momento cu el a baha cu pensioen. El a traha henter su bida pa un solo compania, a keda fiel y hasta despues di baha cu pensioen, e tabata acudi na tur evento importante di “su” compania.
Herbert Horne ta naci na Sint Lucia dia 29 di april 1926 y a fayece siman pasa, dia 29 di september cu no menos di 95 aña di edad. Cu e edad ey, Horne a conoce tur e directornan for di Shon Eddy de Veer, sigui pa su yiu Gerard “Shon” de Veer sigui pa su yiu Eduardo de Veer y despues tambe su yiu Eddie de Veer. Horne tabata e unico ex-trahado na bida cu a traha bou di tur e cuater generacionnan den e compania.
Y claro, su relacion cu compania no tabata tampoco di djis un trahado mas, sino a bira parti di e famia di MetaCorp. Asina por menciona cu Eduardo de Veer ta su padrino di matrimonio y como tal, ta consider’e famia. Hunto a lanta e compania, a traha duro, a celebra triunfonan y a lamenta fracasonan tambe, pero semper cara na laira y cla pa e siguiente reto.
Su storia cu MetaCorp a start ora cu Shon Eddy tabata di bishita na e Coney Island na San Nicolas, cu el a nota un mucha jong ta subi e cabayito y despues baha den pura ora di control, pa evita cu e mester a paga. For di leu sinta den auto Shon Eddy a sigui e hazaña di e hoben y a tuma un decision sorpresivo. El a baha fo’i su auto, cana bay na e cabayitonan y a duna Horne trabou mesora. El a hacie esun responsabel pa e cabayitonan pa garantisa cu ningun hende ta subi pornada. E storia ey a bay te na 2001, ora el a baha cu pensioen cu no menos di 48 aña di trabou fiel na MetaCorp.
Durante su casi 50 añanan di empleo, Horne a traha den diferente compania afilia na MetaCorp pero e mayoria tabata cu ATCO. Un tempo el a traha den e negoshi di cine tambe, pasobra di berdad e tabata un “all around man” pasobra e semper tabata cla pa yuda unda cu tabatin mester di dje. Hasta despues cu el a baha cu pensioen, e semper tabata yama pa comparti un idea, sugeri un otro forma pa brinda miho servicio y hasta critica den caso cu algo no ta bon.
Pa MetaCorp por a alcansa 100 aña continuo di existencia, desde 1920 pa 2020, tabata necesario pa por a conta cu empleadonan fiel manera Herbert Horne, cu a dedica nan alma na progreso di nan mes, di nan compania y di Aruba. “Na henter su famia y na tur colega, mi ta expresa palabranan di condolencia y hopi forsa”, asina Eddie de Veer, director di MetaCorp, a finalisa bisando.
