Politica tin pasado, y e pueblo tambe. Awe, Eman ta presenta su mes como un gran padrino di educacion na Aruba, anunciando cu orguyo cu e ta bay renova dos scol. Pero unda e tabata ora e tabata tin poder na 2014? Pasobra na e momento ey, enbes di invertí den scol di su propio pais, el’a pone placa pa bay traha dos scol na Haití.
Awor, cu un tono sentimental y lagrima di cocodrilo, e ta papia di su eror di pasado. Pero e realidad ta cla: si na 2014 e tabata traha su trabou drechi, awe Aruba no ta keda atraso den e area di educación. No tabata necesario papia di “renobacion urgente”, pasobra nos scolnan ya tabata den bon estado.
No ta un favor, ta su deber
Mester laga algo cla: e hecho cu Eman awor kier renoba dos scol na Aruba no ta un acto di bon curason. Ta su deber. No ta un regaldo cu e ta duna nos, sino un responsabilidad cu e mes a faya hopi aña pasa.
Aki ta e ironía: e tabata prefera invertí den scol na Haití i laga nos scolnan un banda. Nos no tin nada contra cu kier yuda Haití. Pero pa awor e bini papia di scol na Aruba cu no tabata renova, mientras cu el’a traha dos scol nobo na Haití? Eey ta hipocrecia puro.
Aruba promé
Eman mester corda un cos cla: su trabou ta pa Aruba. E tin cu traha pa e muchanan arubiano cu mester scol digno pa haña un educacion bon. Lag’e lubida di yama esaki un gesto noble, paso no ta. E no ta hasi nos un favor.
No por bende nos e historia manera si e ta un heroe. Bay traha loke bo mester a traha hopi aña pasa, y pensa dos biaha prome di laga bo pais bandona pa bai bende un imagen na Haiti.
