100.9 Hits100FM ta presenta su Special Musical di Pasco cu e grupo Americano; Pentatonix. Nan ta un grupo musical “acappella” pues nan ta crea musica uzando solamente nan boca y bos. Ningun instrumento musical ta wordo uza. Tur ritmo, melodia y efecto musical ta vocal. E sonido cu nan ta crea ta moderno y creativo y ta combina diferente genero manera Pop, R&B, Hip Hop y cancionnan di Pasco.
Con nan a cuminsa
E Historia di Pentatonix a cuminsa na Arlington, Texas. Tres di e miembronan, Scott Hoying, Mitch Grassi y Kirstin Maldonado tabata amigo y cantante desde High School. Nan tabata stima musica y semper nan tabata tin e soño di traha algo grandi hunto.
Na aña 2011, Scott a tende di un concurso di canto na television yama The Sing-Off. Na ultimo momento dos persona mas a uni e grupo, esta Kevin Olusola y Avi Kaplan, y nan a forma e grupo Pentatonix. Nan a participa y gana na e Concurso The Sing-Off , ganando un suma di $200.000 y un contracto di produccion cu Sony Music.
Despues di The Sing-Off, Pentatonix a cuminsa subi video riba YouTube unda hopi di nan cancionnan cover y medley a bira viral. Nan a haya miyones di fans rond di mundo, nan a gana 3 Grammy y nan a bende y stream miyones di album. Nan ta conoci specialmente pa nan album di Pasco cu a bira un di e albumnan mas popular di e ultimo añanan. Pentatonix tin 12 album te cu awor y e ultimo cu nan a lansa na 2023 tabata The Greatest Christmas Hits.
Con nan ta haci musica
Pentatonix ta produci musica sin instrumento. Un miembro ta haci ritmo y beat cu su boca, otro ta canta bass y e otro nan ta crea harmonia y melodia. Den studio, nan ta graba cada bos separa y despues nan ta mescla tur cos pa crea un sonido profesional.
Cambio den e grupo
Na ana 2017 tabata tin un cambio den e grupo. Un di e miembronan, Avi Kaplan a dicidi di sali for di e grupo pa sigui su propio caminda musical. Na su luga Matt Sallee a drenta como bass singer.
Awendia, Pentatonix ta sigui crea musica, produci album y haci tour rond di mundo. Di un grupo di amigo cu tabata tin un soño, a bira un di e gruponan acappella di mas grandi y influyente di tur tempo demostrando cu solamente uzando bos humano ta suficiente pa crea musica extraordinario. Comunidad di Aruba lo por disfruta di nan ultimo cancionnan durante di e Special Musical di Hits100FM cu lo pasa Pasco mainta 11:00 AM y 7:00 PM.
