Fecha di e prome LIDERA Conference ta yegando y hunto cu ne e oportunidad unico pa 500 hoben atleta di Aruba por topa cara a cara cu un di e oradonan motivacional di mas impactante awendia, esta Trent Shelton. Esaki ta bay tuma luga 26 di augustus den Ballroom di Marriott, entre 4:30 pa 6:30 di atardi y e ta completamente gratis.
Ademas di ta conoci pa ta un di e “Top Influencers in the Personal Development Space”, Trent Shelton ta e fundado di ‘Rehab Time’ un vision enfoca pa duna bo e hermentnan cu bo tin mester pa bira e persona cu bo ta capaz di bira den bida. E ta tambe e Director Nacional di Rare Breed Academy (RBA) cu tin como mision pa motiva hubentud pa biba nan soñonan y mustra nan con pa haci di e vision ey un realidad. E concepto di RBA ta pa cada mucha realisa su grandesa y biba su miho bida.
“Nunca laga hende planta nan imposibilidadnan den bo bida. Nunca laga hende proyecta nan miedonan den bo mente. Loke ta pa bo no tin nada di haber cu nan. Keda conkista bay” ta un di e ponencianan cu Shelton ta comparti.
ATIA a extende un invitacion na tur organisacion deportivo di e isla pa registra nan atletanan cu tin entre 14 pa 20 aña di edad. E grupo di participante di cada organisacion mag di ta compaña pa 1 coach/representante.
E atardi ta conta tambe cu aporte di celebridadnan deportivo local manera Deevah Leenheer (landamento sincronisa), Jordy Groters (landamento), Elliott Loonstra (Paralympics ) y Nicole Hoeverts (International Olympic Committee). Nan lo comparti nan trayectorio y storia cu deporte y con esaki tabatin un impacto riba nan bida persona y profesional.
Maestro di ceremonia ta Jean Carlo Espinal y lo tin entretenimento musical di Karixon. Esaki ta un inversion cu ATIA ta desea di haci den e lidernan di mañan y, na mesun momento, ta un gesto comunitario pa gradici tur partner den e conferencia LIDERA. No perde e oportunidad aki. Registra na https://lp.atiaruba.org/lidera awe mes!
