Ta nos deber pa adverti, y no sinta laga baca hoga na pos, y despues bisa mi tabata sa.
Pasco a pasa, anja nobo a pasa, y awor nos ta bay drenta e temporada di Carnaval, temporada cu hubentud ta namora di dje, pasobra e ta contene tur clase di libertinahe y perversidad.
Nos tur sa di esey, y nos no por tapa solo cu un dede, cuanto di nos tin experiencia amargo di temporada di Carnaval.
Carnaval ta wordo yama Fiesta di Pueblo, un temporada cu ta ocupa curason di hende asina fuerte cu Famia, Matrimonio ,yuinan, y deber social ta wordo poni un banda, pa asina hende por disfrasa y festeha.
E temporada aki ta asina fuerte cu hende ta bandona caminda di Dios temporalmente, pa nan gosa di carnaval, pasobra nan sa masha bon cu Dios y carnaval no ta bay cu otro pasobra lus no ta uni cu scuridad.
Awor hopi di nos hobennan den temporada di carnaval ta tuma curashi di haci cosnan cu normalmente, nan no ta haci, por ehempel purba alcohol, purba droga, tene relacion sexual cu otro djis pa aventura.Y nos tur sa cu e abusador semper ta buscando oportunidad.
Cuanto hoben no a bay purba un biaha so y a cay den adiccion,
Cuanto hoben no a purba pa un biaha so y a cay sera,
Cuanto hoben a purba pa un biaha so y a perde nan bida.
Cuanto hoben no a keda invalido ora nan a bay purba pa un biaha so.
Cuanto hoben ta cana cu yiu, cu e tata no por cria, of no kier cria pasobra nan a purba un biaha so cu hende robes sin consenshi.
Mas berdad nos papia cu nos hobennan mas cla nan wowo lo habri pa nan reconoce e trampanan di diabel, cual ta wordo dirigi, na cantidad riba nos hubentud, pa asina stroba e proposito di Dios den nan bida.
Aunke un hoben por rabia, e mester wordo coregi, pasobra esey ta deber di un mayor.
Pasobra si abo como mayor awe no coregi, mayan cu Dios kier Ministerio Publico lo coregi bo yiu pa bo.Y cu awa na wowo lo bo tin di paga abogado, pa wak con ta soluciona un asunto cu ta falta di bo negligencia, como mayor.
1 Timoteo 4:12 ta bisa: No laga ningun hende menosprecia bo hubentud. Ma mas bien den palabra,conducta, fe, amor y puresa, demostra bo mes di ta un ehempel pa esnan cu ta kere.
Pasobra boso a wordo yama pa libertad,rumannan, solamente, no usa boso libertad pa e carni. Ma laga un sirbi otro pa medio di amor.( Galationan 5;13).
Mester instrui nos yuinan, cu tur baile bulgar, hopi bebemento, hopi uso di droga, bistimento perverso, manise riba caya, bringamento, matamento, cana cu arma, ningun di e cosnan ey ta agrada Dios, y den e cosnan ey no tin ganashi, ni pa bo mes , ni tampoco pa bo famia, tur tin tristesa y decepcion ta bini nan tras, pasobra nan ta pertenece na scuridad.
E forsa di maldad ta inmenso, e ta lanta den temporada di carnaval, pero e por haci danjo pa resto di bo bida, door cu pa un momento so, bo tabata desobediente na bo mayornan, y bo kier a haci locual cu bo kier, pasobra e enemigo a hinca den bo cabes cu bo mayornan, no kier pa bo gosa di bida.
Hobennan habri wowo, pasobra carnaval ta pasa, pero bo bida y bo personalidad ta keda, no contamina bo mes cu sushedad,pero para firme .
Sinceramente Pastor Marcel Balootje
