ORANJESTAD – Diabierna tabatin un caso interesante caminda tanto Fiscal como Hues a keda empresiona con e homber I.A.D.S. (19), kende tabata 4 aña adicto, a dicidi di cambia su bida completamente.
SOLO DI PUEBLO por a compronde cu I.A.D.S. a admiti di a horta for di un cas caminda turista tabata keda pero awor a dicidi di cambia su bida. E kier rehabilita y bay biba bek na cas serca su mama.
HORTA TURISTA
Den sala di Corte tabata presente e mama di I.A.D.S. y un dama hoben familiar. Fiscal a acusa I.A.D.S. cu riba 7 Juni 2024, el a horta for di un cas caminda un turista tabata kedando. I.A.D.S. lo a horta un I Pad, cuminda, placanan.
Ta asina cu I.A.D.S. a admiti di a horta y cu el a duna e cosnan cu el a horta bek. Hues a bisa cu e victima a demanda 580 florin di daño cu ta placanan cu e tabatin den e cas.
4 AÑA BIBA RIBA CAYA
Segun I.A.D.S., el a drenta via bentana cu no tabata na slot. Hues a puntra I.A.D.S., pakico e ta bay horta. Segun I.A.D.S., e tabata bou influencia di droga y no a pensa mas leu. El a bisa cu e tabata 4 aña adicto, bibando riba caya, pero awor e ta sinti’e bon. Hues a puntra I.A.D.S., kico e ta bay haci ora e Sali for di KIA.
ADICTO KIER REHABILITA
I.A.D.S. a bisa Hues cu ora e sali, e kier rehabilita pa e para riba su pianan. E no kier mas e bida di caya. El a splica cu el a yega di bay rehabilita pero a huy for di e lugar y a sigui droga. Pero awor e kier cambia su bida.
Hues a puntra I.A.D.S., si I.A.D.S. ta sinta den stoel di Hues, kico e lo dicidi como castigo pa I.A.D.S. I.A.D.S. a bisa Hues cu e lo dicidi pa lag’e bay bou di condicion cu e mester rehabilita. Hues a puntra kico e turista lo pensa. I.A.D.S. a bisa cu e turista lo bisa pa I.A.D.S. keda sera. El a bisa cu e ta pidi disculpa pa loke el a haci y cu e lo no haci’e mas.
Fiscal a bisa cu for di Reclasering por compronde cu I.A.D.S. a cuminsa usa droga cu edad jong y tabata biba 4 aña riba caya. I.A.D.S. a bisa Hues cu el a drecha relacion cu su mama y cu e por bay keda serca su mama.
FISCAL
Fiscal a bisa Hues cu e ta haya legalmente proba cu I.A.D.S. a horta. Pa cu e castigo, Fiscal a bisa cu ta considera ladronicia for di cas un caso di impacto grandi. Ladronicia for di un cas, ta crea sentido di inseguridad y den e caso aki ta trata di turista cu ta bin Aruba pa relaha. Tipo di caso asina ta duna Aruba un mal imagen. Fiscal a bisa cu e ta tene cuenta cu I.A.D.S. tin 19 aña. Fiscal ta kere cu ainda I.A.D.S. por drecha su bida.
Fiscal a bisa Hues cu el a keda asombra pa mira e edad jong cu I.A.D.S. a cuminsa usa droga y awor kier rehabilita. Reclasering ta conseha pa I.A.D.S. cay bou nan guia. Fiscal a exigi 8 luna di prison di cual 4 luna ta condicional cu 2 aña di prueba. Fiscal a pone condicion cu I.A.D.S. mester cay bou guia di Reclasering. Pa loke ta e demanda di daño, e 580 florin cu a wordo horta, Fiscal a exigi pa confirma e demanda.
ABOGADO
Mr. Emerencia a bisa Hues cu I.A.D.S., a admiti di loke el a haci. E ta haya cu I.A.D.S. ta realiza kico el a haci. E abogado a mustra cu I.A.D.S. tabata biba riba caya door di adiccion y awor e ta realiza cu e por mihor y kier drecha su bida. E rehabilitacion lo bay yuda I.A.D.S. y awor cu e ta cay bou guia di Reclasering, lo ta hopi bon. Mr. Emerencia ta haya e exigencia di Fiscal ta na su lugar. Pa loke ta e demanda di daño, el a pidi Hues pa tene cuenta cu lo I.A.D.S. lo mester traha pa e por paga y cu esey lo bay tuma tempo.
SENTENCIA
Hues a sera tratamento di e caso y a dicta sentencia di biaha. Hues a bisa cu el a atende hopi caso di hobennan adicto y a keda impresiona cu e actitud di I.A.D.S., kende a keda 4 aña riba caya den adiccion y awor ta dicidi di bay rehabilita. Hues a bisa cu den cierto manera, e tin respet pa I.A.D.S., kende ta dicidi cu ta basta cu e bida di adiccion y sigui riba e caminda bon. Hues ta kere cu un castigo combina y cu guia di Reclasering lo ta mihor pa I.A.D.S. Hues a confirma e exigencia di Fiscal. Hues a condena I.A.D.S. na 8 luna di prison, di cual 4 luna ta condicional cu 2 aña di prueba. Hues a ordena cu I.A.D.S. mester cay bou guia di Reclasering. Hues a bisa tambe cu I.A.D.S. lo mester paga e demanda di daño pero cu e no ta pone medida di pago. Esey ta haci cu ta duna I.A.D.S. tempo pa paga sin pone presion cu si e no paga, e lo bay haya castigo di prison.
