Awe mainta e hoben homber A.M.(18), hunto cu su mama a presenta na Corte pa e caso penal cu Ministerio Publico a cuminsa contra dje. El a wordo haya culpabel di tabata bende marihuana y tabatin marihuana. Tambe cu e tabatin un revolver cu bala.
SOLO DI PUEBLO por a compronde cu tambe cu Polis a detene A.M., e tabatin 17 aña y pesey Hues a aplica castigo hubenil.
E acusacion cu Fiscal a presenta contra A.M. ta cu entre 7 Maart 2024 y 7 Maart 2025, e tabata bende y tabatin marihuana den su posecion. Tambe A.M. ta wordo acusa di posecion di un revolver y balanan entre 7 Januari 2025 y 7 Maart 2025. E tempo ey A.M. tabatin 17 aña y recien A.M. a cumpli 18 aña.
BENDE DROGA
Hues a bisa cu segun e raport di Polis, a haya informacion cu A.M. tin un arma y ta bende droga den Madiki. Polis tambe a informa den su relato, cu na Maart 2025 durante parada di carnaval, A.M. tabatin 20 piedra di droga y Polis a kita esakinan for di dje. Despues, Polis a dicidi di haci investigacion na e cas unda A.M. ta biba. Polis a constata cu na e cas tabatin algun persona. Polis a haya den un cashi un saco cu marihuana. Casi 127 gram di marihuana a haya na e cas. Segun A.M., door di hopi stress door di e situacion cu el a perde dos ser keri tras di otro, e ta usa hopi marihuana pa e trankilisa. Hues a remarca cu e cantidad ta hopi pa propio uso. Segun A.M. e droga no tabata di dje so sino di e homber O. cu tabata kedando cun’e. Segun A.M. e ta usa “berde” y no “kripi”. El a bisa cu120 gram ta di dje y cu pa dia e ta usa 10 sigaria. Hues a bisa cu e cantidad di droga ta mustra cu esaki ta pa bende. El a mustra cu tin dos hende cu ta bisa cu nan tabata cumpra for di A.M. Hues tambe a puntra A.M., kico e tabata haci na Maart 2025 cu 20 piedra. A.M. a bisa Hues cu ta carnaval y esey e tabata usa.
REVOLVER HAYA DEN MONDI
Pa loke ta e revolver, A.M. a bisa Hues cu el a haya e revolver den mondi na Dakota. El a hinca e arma den un caha y na dado momento esaki a disparce. E ta sospecha cu ta e homber O. cu tabata kedando na e cas, lo a coy e revolver. Hues a mustra cu den cellular di A.M. a haya un video di A.M. cu e arma. A.M. a bisa tambe cu e arma tabata frustia y cu e no a ripara cu e revolver tabatin bala. Hues a bisa cu e homber O. a bisa Polis cu e arma ta di A.M. y cu A.M. tin esaki 5 luna. El a bisa cu A.M. tabata fia hende e arma y cu e arma tabata scondi den un auto. El a mustra Polis e auto y Polis a haya e arma. Hues a remarca cu si bay tras di tur hende cu ta cay sera pa arma nan declaracion, ta parce cu den mondinan di Aruba tin hopi arma.
Hues na dado momento a invita e mama di A.M. pa bay sinta dilanti banda di A.M. pa e por papia cu nan. Hues a puntra e mama, con cos ta bayendo cu A.M. E mama a bisa Hues cu el a ripara cu A.M. a cambia y ta trahando. Hues a bisa cu e ta contento di tende esey. El a puntra A.M. si e ta anda cu e amigonan. A.M. a bisa cu e no ta anda cu O. mas.
FISCAL
Fiscal a bisa cu Polis a haya hopi marihuana na e cas unda A.M. tabata keda. Mayoria di e marihuana tabata den A.M. su camber. E arma tambe Polis a haya. Dos hende a bisa di tabata cumpra for di A.M. Fiscal a bisa cu e pregunta ta, kico mester haci pa e hoben aki stop di e caminda robez aki. Fiscal ta haya cu awor A.M. ta realiza cu esaki no ta e caminda bon. El a busca trabao. Fiscal a mustra cu A.M. tabata 105 dia sera. Fiscal ta haya cu un castigo combina ta na su lugar y cu A.M. no mester bolbe bay prison. El a exigi 135 dia di prison di cual 30 dia ta condicional cu 3 aña di prueba. Fiscal a bisa cu A.M. mester considera esaki un forma di aviso. Fiscal a bisa cu posecion di arma ta sumamente peligroso, especialmente den hubentud. El a exigi 120 ora di trabao pa comunidad y si A.M. no cumpli cu esey, e lo mester bay 60 dia den prison.
CASTIGO COMBINA
Despues di a scucha abogado mr. Hernandez, Hues a dicta sentencia di biaha. Hues ta haya A.M. culpabel di posecion y bendemento di marihuana y tambe posecion di un arma di candela. El a bisa cu door cu A.M. ta hoben, e ta dun’e chens. Hues a hala atencion di A.M. cu normal den un caso asina, ta mas cu 1 aña di prison ta e castigo. Den e caso aki, teniendo cuenta cu A.M. tabatin 17 aña, Hues a aplica castigo hubenil. El a condena A.M. na 135 dia di prison di cual 1 luna ta condicional cu 3 aña di prueba y 90 ora di trabao pa comunidad. Si A.M. no cumpli cu e trabao pa comunidad, e lo mester bay 45 dia sera.
