![](https://solodipueblo.com/wp-content/uploads/2024/07/44feff7d-2ff8-45f7-bf09-66e8f20c06ce-15781-00000367f4aeb2b6_file.jpg)
Hof a confirma recientemente cu Leoncita Arends a comete e delito di a soborna ex minister Benny Seviger den e caso di e compania Deshaun. E pruebanan ta abrumador y e testimonio di Sra. Roga ta un parti crucial den esaki.
E Testimonio di Roga
Testigo Roga a declara cu riba ordo di Leoncita Arends ela entrega un envelop di placa na casa di Benny, Castaño Henao. Esaki a tuma lugar despues di benta di e segundo tereno, cu tabata relaciona cu e compania Deshaun. Sra.Roga a describi e envelop como color maron, dobla, rondona cu lastiek y mas o menos siete centimeter gordo/diki. E envelol tabata hole na papel nobo di placa y Roga tabata sigur cu tabatin placa aden pasobra Leoncita tabata contando placa e mesun mainta ey.
Detaye di e Transaccion
Roga a yama Arends na telefon ora cu e no por a haña e cas di Sevinger. Arends a yama e señora di Sevinger, cu despues a sali pafor di cas pa ricibi e envelop.
E defensa di Leoncita no a cuestiona of nenga e contakto aki y cu e encuentro a tuma lugar, pero a declara cu Roga a bay busca ticket di “lotto mega miljons” cu e señora di Sevinger a trece pa Leoncira Arends for di Miami.
Confiabilidad di e Testimonio
Hof a haña cu e declaracionnan di Roga ta confiabel. E tabata traha pa hopi aña como asistente personal di Leoncita Arends y tabata bon informa di su contactonan di negoshi. E declaracionnan di Roga tabata consistente y mas principal, nan tabata detaya, cu a contribui na su confiabilidad. Ademas, e testimonio di Roga tabata sosteni pa datonan di telefon cu ta confirma e contacto entre Roga, Arends y e señora di Sevinger.
Pruebanan di Sosten
E declaracionnan di Roga tabatin sosten di otro pruebanan, inclui datonan di telefon cu a mustra cu Roga a yama Arends y despues e señora di Sevinger riba 21 di januari 2016. Tambe e timeline di benta di e sharesnan/accionnan di Deshaun NV y e transaccionnan finansiero despues, tabata coincidi cu e descripcion di e soborno.
Dia 11 di november 2015 un ‘share purchase agreement’ a keda cera y firma pa e benta di shares di Deshaun na Porco Gallina. Dos dia despues un voorschot di $40,000,- a wordu paga na e cuenta di banco na Merca di Leoncita Arends, di cual $24,000,- a wordo lanta den cash. Esaki hunto cu e entrega di e envelop cu placa den dje dos luna despues tabata coincidi cu e timeline di e evento.
Defensa di Leoncita a faya:
E defensa di Leoncita a declara cu Roga tabata bay buska ticket di loteria, pero es declaracion ey no tabata cuadra ku e timeline. Segun Arends, loteria por wordo cumpra solamente dos dia prome di un sorteo, y e señora di Sevinger tabata na Miami dos luna prome.
Hof a haña esaki no creible cu Roga lo a bay busca ticket di loteria di dos luna bieuw riba 21 di januari 2016. Ademas, Arends anterioramente a nenga na Landsrecherche cu el’a manda Roga na cas di Sevinger.
Conclucion:
Hof a conclui cu Arends a manda Roga na e cas di Sevinger pa entrega un envelop cu placa na su señora dia 21 januari 2016. E montante di e placa tabata pa cumpra e minister, pa haña un derecho di optie y erfpacht di tereno pa Deshaun. E veredicto ta confirma e acusacionnan serio di soborno y ta subraya e abuso di posicion y poder di parti di Leoncita Arends. Arends a wordo condena na 2 aña di prison y Benny sevinger pa 4 aña.