Den e sentencia reciente, Hof a tuma un posicion cla riba e separacion entre compania y persona natural den caso Avestruz, unda a abuso di entidad huridico (compania). E sentencia numbera H-68/23, a revela cu e diferensia di identidad entre compania huridico “nv of vba” y persona natural mester wordo respeta, pero ta reconoce cu e diferensia aki por ser ignora bao di sierto circumnstancia special.
Hechosnan di e caso:
E caso ta bay riba e companianan Elenath y Deshaun, dos compania comletamente den man di Leoncita Arends na e momento cu nan a hasi peticion pa un derecho di erfpacht comercial. E companianan tabata completamente sin fondo, sin placa cash na momento cu a lanta e compania na notario y ora di haci e peticionnan, y asina nan no tabatin ningun balor financiero of capacidad pa desaroya proyecto.
Arends a pone su yiu muhe Richardson, cu tabatin 19 aña na e momento ey, como directora di Elenath y su trahador Winterdal como directora di Deshaun. Ningun di e directornan aki tabatin experencia den desaroyo di proyecto, y e nombramentonan aki ta parse cu tabata pa cubri e hecho cu Arends tabata e doño y beneficiario real di e entidad huridiconan (nv) aki.
Abuso di entidad huridico (compania nv):
Hof a conclui cu Arends a abusa di e entidadnan huridico Elenath y Deshaun pa beneficio personal pa medio di engaño. E companianan a ser crea cu e unico meta di haña derecho di erfpacht, cu despues a ser bendi cu hopi ganashi. E ingreso di benta a bay principalmente na beneficio di Arends, cu como persona natural a beneficia di e aumento di balor di e sharesnan/accionnan.
Arends a actua di un manera engañoso y fraudulento, trahando huntu cu e ministro Benny Sevinger pa duna un representacion incorecto di e situacion, pa haña e derecho di opcion. Pa tapa su actonan fraudulento, e tabata usa e entidad huridiconan como un capa.
Pensamento y conclucion di Hof
Hof a conclui cu e actonan di Arends ta un construccion falso. E poder completo y dominio cu Arends tabatin riba Elenath y Deshaun, ta aclara e caracter engañoso y fraudulento di su actonan, y ta hustifica segun Hof cu e entidad huridiconan por ta identifica cu e persona natural Leoncita Arends. Bao di e circunstansianan aki, e actonan comete pa e entidad huridico (nv) ta wordo atribui na esun cu tabatin e poder riba nan, den es caso aki; Leoncita Arends.
Importancia di e Sentencia
E sentencia aki ta pone na cla cu apesar di cu e diferencia di identidad entre entidad huridico (nv) y persona natural normalmente mester wordo respeta, e por ser ignora bao di circunstansianan special. Hof ta cla cu ora cu entidadnan huridico wordo abusa pa meta fraudulento, e persona natural tras di e entidadnan aki por ta responsabel pa e actonan di e entidad huridico.
E sentencia aki ta sirbi como un advertensia pa esnan cu kier usa entidad huridico (nv) como un capa pa haci actividadnan fraudulento, y ta confirma cu Hof ta dispuesto pa mira door en door den e construccionnan huridico aki pa asina garantisa husticia.
