Dialuna mainta Hof di Corte Superior a cuminsa cu e procedura pa mira si ta honra e peticion di Cornelio Antonio Hermanus (67), pa e haya su libertad.
SOLO DI PUEBLO por a compronde cu riba peticion di Procurador General, Hof a bay di acuerdo pa pospone e tratamento di e caso pasobra ainda falta hopi informacion.
CONDENA BIDA LARGO PA ASESINATO
Na 2006, Cornelio Hermanus a wordo condena na bida largo den prison. El a wordo haya culpabel di a hinca Raul Croes cu cuchiu den garganta cu consecuencia fatal. Ta asina cu den pasado Cornelio a sinta castigo caba na Hulanda pa a mata dos hende y despues a bin Aruba y asesina e victima. Esey a pone cu Corte di Husticia a condena Cornelio Hermanus na bida largo den prison.
Den sala di Corte tabata presente un comision “Bida Largo” cu ta consisti di hendenan di Ministerio Publico, KIA. Di KIA tabatin trahadornan social, psycologo. Presidente di Hof a remarca cu e no ta mira famia di e victima den sala. El a puntra PG si a invita e famia pa ta presente. PG a bisa Hof cu el a invita e famia pero ningun familiar di e victima no a presenta. Ta asina cu e famia a manda un carta pa Hof cu nan opinion pa cu e peticion di Cornelio Hermanus pa e haya libertad.
PIDI PA HAYA LIBERTAD
Presidente di Hof a bisa cu segun ley, despues di 20 aña sera den prison, e acusado por haci peticion pa e haya su libertad. Tin henter un procedura cu mester sigui. Hof a bisa cu Gobierno di Aruba mester ofrece e posibilidadnan pa asina Cornelio Hermanus por bay liber. Ta asina cu tin un procedura hopi largo cu a cuminsa cana for di 2024, caminda a consulta cu psychiaternan, psycologonan, Reclasering, trahadornan social di KIA. Tin cantidad di raportnan cu Hof a haya pa asina tin un bista si Cornelio por haya su libertad.
PG A PIDI PA POSPONE E PROCEDURA
Hof a bisa cu PG a manda su opinion riba papel caminda e ta pidi pa pospone e procedura. PG a hiba palabra den Corte caminda el a bisa Hof cu e no ta haya cu awor ta e momento pa trata e procedura. PG a bisa cu a base di tur e raportnan di evaluacion, e ta haya cu mester percura cu e medidanan y tratamento di Cornelio ta bon planifica. Esey ainda no ta completa.
PG a splica Hof cu ya tin un cas sigur na unda Cornelio por bay keda pero no tin idea si e bario lo accepta. PG ta haya cu mester percura cu e condicionnan di tratamento y anda cu Cornelio ta solido. Awor aki no ta asina. PG a bisa cu Reclasering a bisa cu na Mei 2026 lo por tin un mihor bista riba Cornelio. PG a pidi Hof pa pospone e caso aki te na Mei 2026.
Hof a bisa Cornelio cu hopi ta depende di su mes. E no por sinta man cruza y spera cu tur cos ta cay for di cielo. Hof a bisa cu segun ley, si awor no ta posibel pa laga Cornelio liber, dentro di 5 aña, Cornelio por haci un otro peticion aki 5 aña y asina lo por sigui cada 5 cinco aña.
PG a bisa Hof cu for di KIA lo bay cuminsa duna cursonan na Cornelio. El a bisa cu tur esnan envolvi lo bay traha hunto riba e tratamento y guia di Cornelio. PG a bisa cu e ta preocupa cu te ainda no tin nada concreto. Ariba pregunta di Hof si Cornelio lo kier ayudo, Cornelio a bisa cu e mester ayudo. El a bisa cu e tin hopi aña sera den KIA y no tin ningun problema den KIA. E kier ayudo pa e por resocialisa. El a bisa cu el a perde un wowo. E tin un rudia malo, lomba malo, problema cu circulacion di sanger.
A PIDI FAMIA DI VICTIMA PORDON
Hof a mustra cu psycologo ta mustra cu Cornelio no ta responsabiliza pa loke el a haci y no ta mustra di tin duele. Cornelio a reacciona cu ta duele di loke a pasa. El a bisa Hof cu e incidente no mester a pasa mes. El a bisa cu den KIA ora tin situacionnnan tenso e ta aleha. Hof a mustra cu den comunidad, Cornelio lo hay’e cu diferente tipo di situacion y a puntra si Cornelio ta habri pa esaki. Cornelio a bisa cu e ta habri. Hof a mustra cu psycologo di KIA a bisa cu Cornelio a nenga di haya tratamento. Segun Cornelio, nunca el a nenga. Cornelio a bisa cu su deseo ta pa reuni cu su famia. El a bisa cu na KIA e ta haya bishita di 1 persona so. Segun Cornelio, tin rumannan cu a fayece e no a haya chens di bay entiero. El a bisa cu el a pidi pordon na famia di e victima y tambe e ta pidi Hof pordon. El a bisa cu e ta resa tur dia y pidi Dios pa pordon’e. Psycologo di KIA a splica Hof cu anterior Cornelio tabata pensa cu e ta keda den KIA y no tabata kier tratamento. Awor cu e situacion aki a presenta, e ta mira cambionan den Cornelio. E ta kere cu mester di mas cu 3 luna pa caba di stimula Cornelio. Hof a bisa cu nan tin copia di e carta di pordon cu Cornelio a manda pa famia di e victima.
ABOGADO
Mr. Croes a bisa Hof cu e conoce Hermanus pa hopi tempo. El a representa Hermanus tempo di apelacion di e caso di asesinato. El a bisa cu Cornelio ta soña loke a pasa y ta areprenti loke a sosode. El a bisa cu en total Cornelio tin 40 aña sera.
POSPONE CASO
Hof a pospone e caso un rato pa pensa kico lo bay haci. Ora Hof a bolbe, a duna di conoce cu ta pospone e caso te 31 Augustus 2026 pa 10’or mainta. Hof a bisa cu na Mei 2026 lo bay tin un evaluacion. Hof ta spera cu na Mei via PG, Hof lo haya sa con a bay cu e plannan di accion. Hof kier pa esnan cu ta atendiendo cu Cornelio, tambe bisa con ta bayendo y duna un bista cla kico ta e plannan di atencion y tratamento di Cornelio.
Hof a bisa cu na Augustus 2026, Hof kier un raport completo di tur esnan envolvi cu Cornelio. Hof kier pa e dos psychiaternan y psycologo haya tur e relatonan pa nan tin nan comentario y posibel plannan. Hof a bisa cu e mester haya tur e relatonan 2 siman promer cu 31 Augustus 2026 pa asina studia esakinan debidamente. Hof a enfatisa cu ta e evaluacion di tur y e esfuerzo di Cornelio ta pone kico lo bay pasa. Hof a instrui PG pa percura cu e famianan di e victima ta presente den Corte.
