Awe merdia 2’or, Hof di Corte Superior, a confirma e condena di 15 aña di prison pa Michael Gibson. E ta wordo haya culpable di riba 1 Mei 2017 a tira mata e Chines H.Quach den un apartamento na Yaburibari.
ARUBA NATIVE por a compronde cu luna pasa, despues di practicamente 3 aña, a sigui cu tratamento di e caso den apelacion. Na October 2019 Hues di Corte den Promer Instancia ta haya Gibson culpable di a tira mata e Chines H.Quach. Hues a sigui Fiscal su exigencia y a condena Gibson na 15 aña di prison.
Varios biaha abogado mr. Arendsz Marchena a purba di haya testigo na Canada pa wordo scucha pa autoridad Canades pero esaki no tabata posibel. Autoridad Canades a informa cu no por haya e personanan y tin algun a laga sa di no kier duna declaracion.
Gibson a bisa Hof cu e tin famia grandi na Canada y e famianan di e victima y esnan envolvi tambe. E ta conciente di e peliger cu su famia ta aden y pesey no a duna declaracion completo.
El a bisa Hof cu e ta prefera di sinta e castigo, cu bay papia den Corte y su famia ta core peliger pa loke e ta declara. El a bisa cu si e duna declaracion, e lo wordo mira como informante. Gibson a bisa cu e unico cos cu e lo bisa ta cu e no a tira y no tabatin arma. El a admiti di tabata den e apartamento pero no den e camber caminda e homber H.Quach a wordo tira mata.
Procurador General a exigi pa Hof confirma e castigo y ayera Hof a confirma e castigo. Michael Gibson ta keda condena na 15 aña di prison.
