Diabierna den careda algo prome cu 2’or di merdia, alarm a wordo bati na moment cu un baby di 1 aña y mey a hoga den un pisina na a adres na Sabana Basora. Famia hopi desespera a pidi pa presencia di ambulance y polis cu hopi urgencia.
Na yegada di polis y ambulance, por a mira e paramediconan mesora cuminsa eherce CPR cu e criatura, tambe por a nota e miembronan di famia present hopi desespera y altera, un golpi hopi fuerte pa e famia., pa e motibo aki a pidi pa presencia di Slachtofferhulp, Janine di Slachtofferhulp hopi lihe a yega na e cas pa asina asisti e famia den su tristesa grandi.
Varios patruya di polis también tabata na e cas, pa basta rato e paramediconan di ambulance a keda intenta di reanima e criatura pero sin resultado, despues di varios intent a bin ripara cu e curpa di e criatura ya no tabata reaciona mas y cu e la Fayece. No a keda e paramediconan nada otro di tapa e curpa chikito sin bida y pidi pa presencia di un dokter pa constata morto. Mientras tabata wardando riba dokter por una nota yegada di polis tecnico y tambe varios miembros di famia di e criatura. Un tristeza masha grandi mes pa e famia, cu no tin palabra pa describi’e. Den careda di 3’or y 10 Dr. Texier a constata morto di e baby di inicial JRG naci na Aruba.
SOLO DDI PUEBLO kier a expresa su mas palabranan di profunda condolencia na famia di e baby.
