Hoge Raad a confirma condena di Sussebeek den caso di soborno i laba placa
E caso penal contra Sussebeek a yega na su fin den Hulanda. Riba 14 di april 2026, e Hoge Raad der Nederlanden a dicidi pa rechasa e apelacion den cassatie. Esaki ta nifica cu e condena cu tabata impone anteriormente pa e Gemeenschappelijk Hof van Justitie ta keda na vigor.
Sussebeek a keda condena pa: soborno activo di un funcionario publico, esta un minister, i pa witwassen, esta laba placa.
Segun tribunal, Sussebeek a paga varios gasto personal pa e ex-minister di Infrastructura. Entre otro, a haci pago pa: un hekki di cura na cas di e minister, trabounan den hardin i sistema di awa, i un gym machine cu a wordo entrega na su cas.
E tribunal a considera cu esakinan no por wordo mira como regaldonan normal entre amigo. Segun e hueznan, e pagonan aki tabatin como meta pa haña trato preferencial y fabor den decisionnan oficial tocante tereno comercial den erfpacht.
Durante e periodo menciona den e caso, companianan liga cu Sussebeek a haña varios derechonan i opcionnan riba tereno comercial. Tribunal a conclui cu e relacion entre Sussebeek i e minister a wordo usa pa duna ventaha den negoshi tereno.
Tambe a wordo determina cu un entrada grandi di placa, relaciona cu benta di accionnan di un compania cu a haya derechonan riba tereno, tabata indirectamente producto di e soborno. P’esey tribunal a condena Sussebeek tambe pa witwassen.
E condena cu ta keda firme awor ta: 30 luna di prison, di cual 10 luna condicional, cu un periodo di prueba di 3 aña.
Ademas, un suma di USD 1.329.711,51 a wordo confisca na Orco Bank na Curacao, cual Sussebeek lo no haya mas.
Na cassatie, abogadonan di Sussebeek a trata di laga e decision wordu anula. Pero e Hoge Raad a bisa cu e kehonan no ta suficiente pa kibra e decision di hof. Corte Supremo no a duna un splicacion largo, pasobra segun ley esaki no tabata necesario. E simplemente a conclui cu no tin motibo pa cambia e sentencia.
Esesencia di e decision final ta:
E condena contra Sussebeek pa soborno i laba placa ta definitivo. Cu e sentencia di 14 di april 2026, e asunto legal a cera i decision anterior ta keda completamente na vigor.
Na final, esaki ta nifica cu Sussebeek no tin mas caminda legal pa cana. Awor e hora zero ta yega, unda e mester bay cumpli cu e castigo di prison.
