E homber G.C., kende Dialuna 19 Mei 2025 su caso di apelacion contra su condena di 6 aña di prison a keda trata, awe ta liber.
SOLO DI PUEBLO por a compronde cu Diamars, Hof a ordena pa KIA laga G.C. liber y Diaranzon merdia G.C. a presenta den Corte caminda Hof a declar’e liber.
Dialuna Procurador General (PG), den e caso di apelacion, a acusa G.C. cu riba 1 Januari 2024 el a purba di mata un pareha den auto, door di tira riba e auto. Tambe PG a acusa G.C. di posecion di un arma di candela. Ta asina cu G.C. a apela e castigo pasobra e ta para riba cu e ta inocente. .
PG A EXIGI PA 6 AÑA DI PRISON
PG a bisa Hof cu e ta haya cu corectamente Hues den Promer Instancia a dicidi cu G.C. ta culpabel di intento di mata door di tira y posecion di arma di candela. PG a mustra cu abogado D.Croes a bisa cu ta S.J. mes a tira riba e auto pa asina haci danjo na G.C. Hues no a kere declaracion di G.C. cu e no a tira. Hues ta haya cu G.C. a tuma riesgo cu door di tira, por a mata un di e hendenan den auto. PG a pidi Hof pa mantene e castigo di 6 aña di prison.
ABOGADO
Mr. D.Croes a bisa Hof cu PG no por a demostra cu G.C. ta esun cu a tira y pesey ta pidi Hof pa declara G.C. liber. Abogado ta haya cu declaracion di e pareha ta contradeci otro y despues nan a wordo adapta pa ta mesun cos. Pa loke ta tiramento, e pareha ta bisa cu ta pafor di e cas G.C. a tira y despues ta bisa cu ta paden di cura el a tira. No a haci muestra di tiro riba man di G.C. Tabatin 5 hende na cas y ningun hende no a tende nada di tiro. E abogado no ta haya cu tin suficiente prueba cu G.C. a tira riba e auto. El a remarca cu e glasnan kibra a wordo tira despues riba e caminda. Con por ta posibel cu no a haya huls. E glas di auto ta getint y con por ta cu e parti di glas cu a haya riba caminda, ainda tabata riba e windshield patras. E abogado a bisa cu si a tira riba un distancia, por a mira e glasnan pega na e tint y no glasnan kibra riba caminda. Na opinion di mr. Croes, ta e homber S. mes a tira riba su auto pa asina G.C. bay sera. Abogado ta haya cu mester declara G.C. liber.
HOF A DECLARA HOMBER LIBER
Diaranzon merdia G.C. a presenta den Corte y Hof a bisa cu e investigacion di Polis a tuma lugar 10 dia despues di e incidente, na e lugar unda e tiramento lo a tuma lugar. Hof ta haya cu no tin prueba y a declara G.C. liber.
