E homber M.G.(27) diabierna mainta a presenta dilanti Hues pa e caso penal cu Ministerio Publico a cuminsa contra dje.
SOLO DI PUEBLO por a compronde cu Hues ta haya M.G. culpabel di importacion di marihuana y posecion di arma. M.G. a wordo condena na 15 luna di prison di cual 3 luna ta condicional.
E acusacionnan cu Fiscal a presenta ayera mainta contra M.G. ta cu entre 14 y 16 Januari 2026, M.G. a importa un cantidad di marihuana. Tambe cu entre 17 December 2025 y 5 Februari 2026, e tabatin potretnan di 2 revolver y un pistool den su cellular. Fiscal ta considera esaki, posecion di armanan di candela.
DROGA DEN CAHA DI CARGA
Hues a bisa cu segun e raport di Douane, dia 16 Januari 2026 a controla un container cu a bin for di Hulanda. Ta asina cu e cacho anti droga a reacciona riba un caha di carton. Investigacion a mustra cu den e caha di carton tabatin 10 paki di marihuana cu a pisa casi 1 kilo.
Segun M.G., e no sa cu tabatin droga den e caha di carton. El a bisa cu un conoci, un tal K. na Hulanda, a bis’e cu e ta manda pieza di brommer y pa M.G. ricibi esaki y cu hende lo busca e piezanan serca M.G.
Hues a remarca cu M.G. a declara na Polis cu un homber K. a bis’e cu lo manda mangel y coy hunga pa su yiunan. Segun M.G. promer K. a bis’e cu ta mangel y coy hunga pero despues ora Polis a detene ta resulta cu ta droga. E ora ey M.G. a bisa cu K. a bis’e cu ta piezanan di brommer. Segun M.G., el a paga impuesto di e carga di Hulanda di K. pero e no tabata sa cu ta droga. Hues a puntra M.G. di unda el a conoce K. Segun M.G., via facebook y video call el a conoce K. pero nunca el a bay Hulanda.
POTRET DI ARMANAN
Hues a bisa cu den e cellular di M.G., Polis a haya potretnan y video di armanan di candela. Polis ta considera esakinan armanan real. Segun M.G. e no tin arma di candela. El a bisa Hues cu el a saca potret di hendenan conoci, cu tin armanan pero no real. Hues a puntr’e pa nomber di e hendenan y M.G. a bisa cu e no ta menciona nomber pa no haya su mes den problema cu e hendenan. Hues a remarca cu M.G. a declara na Polis cu el a tira e armanan afor. Segun M.G. el a bisa asina pa no tin problema. M.G. a bisa cu e kier keda cla cu e caso pa e cria su dos yiunan, un di 1 aña y un otro cu ta bay haci 3 aña. El a bisa cu e mama di e muchanan ta trahando y e muchanan ta keda serca e wela.
Hues a bisa cu anterior M.G. a haya castigo di 2 aña di prison pa posecion di arma. M.G. a bisa cu e kier sali for di KIA pa e traha y mantene su famia.
FISCAL
Fiscal a bisa Hues cu e ta haya legalmente proba cu M.G. tabatin un lote di marihuana y posecion di arma di candela. Douane a haya den e caha di carton 10 paki di marihuana cu a pisa 992 gram, cu ta casi 1 kilo. Fiscal ta haya straño cu M.G. ta bisa cu K. a bisa cu e ta manda mangel y coy hunga pa M.G. su yiunan. Fiscal a bisa cu e no ta kere declaracion di M.G. E ta haya cu M.G. mester a check bon promer cu a dicidi di tuma carga for di hende na Hulanda.
Pa loke ta e armanan, Fiscal a bisa cu Polis a mustra cu tin un potret caminda ta mira M.G. cu arma hunto cu su yiu. Fiscal a bisa cu e ta haya legalmente proba cu M.G. tabatin e armanan. Na opinion di Fiscal, investigacion haci di parti di Polis, ta mustra cu ta trata di armanan real. Hues a remarca cu for di raport di Polis ta papia cu ta dos revolver y un pistool cu ta parce real y por wordo usa pa menaza hende. Fiscal a bisa Hues cu esey ta loke ta para den ley cu Polis a usa. Fiscal a bisa cu e ta haya cu M.G. ta castigabel. Pa cu e castigo, Fiscal a mustra cu na 2021 M.G. a haya condena caba pa posecion di arma. Fiscal a exigi 22 luna di prison di cual 9 luna ta condicional cu un tempo di prueba di 3 aña.
ABOGADO
Abogado mr. Kuster a bisa Hues cu M.G. a bisa cu e homber K. na Hulanda a bisa cu lo manda mangel y coy hunga pa M.G. M.G. no tabata sa cu den e caha di carton tabatin droga. E abogado a bisa cu M.G. a puntra K. si tin algo ilegal den e caha. Door cu K. a bis’e no, el a bay paga e impuesto y no tabata sa cu tin droga. E abogado ta haya cu M.G. mester wordo declara liber pasobra e no tabata sa di droga. Pa loke ta e armanan, e abogado a bisa cu M.G. a saca potret di armanan di imitacion y no kier a bisa di kende e armanan ta, pa no hinca e hende den problema. Na opinion di abogado, no por bisa cu seguridad cu ta armanan di candela real. E abogado ta haya cu mester declara M.G. liber pa esey tambe y si Hues ta hay’e culpabel, e ta referi na decision di Hues.
CASTIGO DI PRISON PA DROGA Y ARMA
Hues a sera tratamento di e caso y a bay evalua un rato pa despues dicta sentencia. Hues ta haya M.G. complice di importacion di marihuana. Hues a bisa cu e no ta kere e storia di M.G. Pa loke ta e armanan, Hues a bisa cu segun Polis e potretnan ta parce armanan real y ta ideal pa menaza hende. Hues a splica cu ta pesey den ley ta castigabel na cosnan cu ta parce un arma real. Na opinion di Hues, esey ta nifica cu M.G. a viola e ley di arma. El a sigui bisa cu ley ta baha pisa riba arma real. Sinembargo, no tin prueba cu ta trata di arma real. Hues a bisa cu e ta tene cuenta cu M.G. a yega di haya castigo pa posecion di arma. Hues a condena M.G. na 15 luna di prison di cual 3 luna ta condicional cu 3 aña di prueba.
