Corte di Husticia a trata e caso penal cu Ministerio Publico a cuminsa contra e homber M.E. (35) di Hulanda biba na Aruba. E ta wordo acusa cu durante Juni 2022 y 23 Juli 2023 a haci traficacion di hende, door di laga damanan haci prostitucion ilegal. E otro acusacion ta cu M.E. riba 16 Augustus 2023 a menaza e homber V.C. cu morto. 

SOLO DI PUEBLO por a compronde cu M.E. a admiti di a cumpra pasashi pa e damanan bin Aruba y tabata haci servicio escort cu nan. Fiscal a exigi 18 luna di prison pa M.E. 

MENAZA 

Hues a cuminsa cu e caso mas chikito cu ta e menaza. M.E. a bisa cu e no a menaza cu arma. El a bisa Hues cu el a bay yama e homber V.C. pa papia loke el a bisa su señora. Hues a mustra cu den e relato di Polis ta para cu M.E. lo a bisa entre otro (Ma..o, mi ta tira bo mata y of “bin mi lugar awor pa nos mata otro” y riba whatsapp “Hijo de p..a. Te quede esparando. Como una Ma…a no veniste”. M.E. a desmenti esaki. Hues a bisa cu na di dos yamada di M.E., V.C. a pone e cellular riba speaker y un otro hende tambe a scucha e menaza. M.E. ta bisa cu e no a menaza V.C. Hues a bisa cu M.E. a wordo interoga pa Polis caminda el a bisa cu V.C. lo ta maltrata damanan den hanchi pero e no a menace cu morto.

TRAFICACION DI HENDE

Hues a mustra cu M.E. tabatin tres bar na San Nicolas. E ta wordo acusa di a trece damanan ilegal na Aruba of a duna hospedahe na damanan cu ta ilegal. Ta asina cu tabatin 7 dama gara pa Warda Nos Costa y nan a declara cu cada un tabata huur apartamento 100 florin pa dia serca M.E. y cu nan tabata haci prostitucion. 

   Hues a mustra con e damanan a declara cu nan tabata huur apartamento na M.E. y M.E. tabata trece clientenan pa escort service. Hues a mustra tambe cu Polis a haya chat riba cellular di e damanan caminda M.E. tabata duna e damanan 450 dollar pa mustra na Immigacion. Na cuminsamento M.E. tabata desmenti. Pero despues di interogacion di Hues, M.E. a admiti di a cumpra pasashi. Hues a sigui haci preguntanan y na dado momento el a bisa M.E. cu e no ta kere nada cu loke M.E. ta splica pasobra e no ta cuadra.

   Segun M.E. el a deshaci di e 3 barnan y un otro hende a tuma esakinan over. E ta dedica su mes den diving cual e ta haciendo pa 15 aña. E tin certificado como dive master y trata hendenan cu bira malo door di dive.

FISCAL 

Fiscal a bisa Hues cu na November 2022, Polis a cuminsa cu investigacion ora cu un dama a haci denuncia contra M.E. Dama a bisa cu M.E. a facilita apartamento cu e mester paga 85 florin pa dia y si paga laat tin cu paga boet. E dama a bisa cu nan tabata haci prostitucion pa M.E. En total 7 dama a haci denuncia. Fiscal a bisa cu Polis a investiga chat riba whatsapp entre M.E. cu e damanan. Fiscal ta haya cu e declaracion di e damanan ta mustra cu M.E. tabata busca e damanan for di Colombia y laga nan haci prostitucion caminda nan mester paga 100 florin pa dia pa e camber. Fiscal ta considera cu M.E. tabata haci traficacion di damanan. Fiscal a lesa declaracion di e damanan cu ta mustra cu M.E. a bisa nan pa na Aruba, bisa cu nan ta turista y ora Immigracion laga nan pasa, nan ta bay traha pa M.E. Fiscal ta haya cu M.E. ta responsabel pa e damanan cu tabata trahando prostitucion ilegal. 

   Pa loke ta e menaza, Fiscal ta haya legalmente proba. El a mustra riba e chatnan cu ta mustra claramente cu M.E. kier a maltrata e homber V.C. 

   Pa cu e castigo, Fiscal a bisa cu traficacion di hende ta un asunto serio. Nan por pone salubridad den peliger. El a bisa cu e ta tene cuenta cu ta promer biaha cu M.E. ta cay sera y a exigi 18 luna di prison di cual 6 luna ta condicional cu 2 aña di prueba. 

ABOGADO 

Mr. D.Croes a cuminsa riba e acusacion di traficacion di hende. E abogado ta haya cu M.E. solamente a ofrece estadia y pa esaki mester a duna un boet y no castigo di prison. Segun mr. Croes, ta un hende so M.E. a cumpra ticket p’e y no manera ta pretende cu ta pa tur siete. E otronan a cumpra nan mesun ticket. E abogado a bisa cu M.E. no a obliga e damanan pa haci prostitucion y no a menaza nan. E ta haya cu e damanan tabata tira culpa riba M.E. pa asina nan no haya culpa. 

   Pa loke ta e acusacion di menaza, segun mr. Croes, e homber V.C. lo a papia cosnan for di sla y M.E. a papia bruto cu V.C. Ningun momento a menaza di mata. El a bisa cu mas biaha M.E. tabatin problema cu V.C. cu tabata maltrata damanan den hanchi na San Nicolas. E abogado ta haya cu mester declara M.E. liber di e acusacion di traficacion di hende. E ta haya e castigo exigi pa Fiscal demasiado halto. 

Hues a sera tratamento di e caso y a bisa cu e ta bay studia e caso y dia 12 April 2024 lo tin sentencia.

LEAVE A REPLY

Please enter your comment!
Please enter your name here