E homber Dominicano G.C. (43) a presenta den Corte recien pa e caso penal cu Ministerio Publico a cuminsa contra dje. E ta wordo acusa di intento di mata door di a hinca un homber cu un Stanley Mes den bariga.
SOLO DI PUEBLO por a compronde cu Fiscal a exigi 4 aña di prison pa G.C. pasobra Fiscal ta hay’e culpabel di intento di mata. Hues a baha e castigo pasobra Hues ta haya cu ta e victima a cuminsa promer. Hues a condena G.C. na 18 luna di prison.
E acusacionnan cu Fiscal a presenta den Corte contra G.C. ta cu riba 7 Maart 2026 el a purba mata e homber L.W. Fiscal a bisa cu G.C. a hinca L.W. cu cuchiu den bariga. Fiscal a sigui bisa cu subsidiario, e ta acusa G.C. di maltrato severo y mas subsidiario, di intento di maltrato severo.
HINCA CU STANLEY MES
Hues a bisa cu G.C. a admiti cu el a hinca L.W. cu un Stanley Mes. Hues a puntra G.A.S.C. kico a pasa. Segun G.C., e cu L.W. ta amigo. Un dia nan a top ana un lugar caminda nan a pusta placa, kende lo bay mihor. A resulta cu L.W. a gana y segun G.C. el a paga L.W. 100 florin di e pustamento di placa cu el a perde. G.C. a sigui bisa cu despues L.W. lo a sigui papia cu G.C. lo debe placa. Despues di 1 siman e tabata na un lugar nocturno cu su amiga y el a mira L.W. yega cu otro dos amigo. Segun G.C., e dos hombernan cu L.W., ta hendenan peligroso. Na dado momento el a bay baño y promer cu e yega baño, L.W. a dal’e mokete na cara. E momento ey G.C. a pasa man pa e Stanley Mes di trabao cu e tabatin den su carson y a hinca L.W. den bariga y core bay. E dos hombernan a sigui su tras. G.C. a bisa Hues cu el a core te ora el a topa un Polis y a bisa e Polis. El a bay sconde y despues a entrega su mes.
Hues a puntra, pakico G.C. a coy e Stanley Mes y no a dal bek cu mokete. Segun G.C., e momento ey el a reacciona asina mirando cu nan tabata tres. El a bisa cu e Stanley Mes tabata den su carson di trabao.
Hues a bisa cu segun Polis, a mira un homber para banda di un auto y a kere cu lo tin un accidente. E homber a bisa Polis cu su amigo L.W. a wordo hinca door di G.C., kende a core bay den un auto. Despues Polis a detene G.C. Polis a bay hospital y a papia cu L.W., kende a bisa cu ta G.C. a hinke.
VICTIMA OPERA DI INMEDIATO
Hues a mustra cu L.W. tabatin un hinca di 7 cm hundo y e hinca a afecta su tripa. Na hospital mester a opera di biaha caminda specialista mester a kita un pida di e tripa. L.W. a keda 5 dia interna den hospital.
G.C. cu wowo na awa a bisa Hues cu e ta arepenti di loke el a haci.
FISCAL A EXIGI 4 AÑA DI PRISON
Fiscal a bisa Hues cu e ta haya legalmente proba intento di mata. Fiscal a bisa cu e no ta mira cu aki por papia cu G.C. a actua den defensa propio. Tabatin un problema entre G.C. y L.W. Fiscal a bisa cu L.W. a declara cu diferente biaha G.C. tabata provoca L.W. na diferente lugar. Fiscal a bisa cu un Stanley Mes ta sumamente peligroso ya cu e ta hopi skerpi. Fiscal a bisa cu e ta kere cu G.C. tabatin e Stanley Mes teni den su carson y tabata prepara pa L.W. E pregunta cu ta surgi ta, esaki tabata defensa propio of un ataque. Fiscal ta haya cu tur e asunto aki tabata por nada. Un discusion riba 100 florin ta escala bira un hincamento caminda na hospital mester a opera di emergencia L.W. y scapa L.W.
Fiscal a mustra cu G.C. a hinca cu forza y penetra 7 cm den bariga di L.W. Na opinion di Fiscal, G.C. a tuma e riesgo cu e por a mata L.W. Fiscal a exigi 4 aña di prison di cual 1 aña ta condicional cu 3 aña di prueba.
ABOGADO TA PAPIA DI DEFENSA PROPIO
Abogado mr. Carlo a bisa Hues cu e ta haya cu G.C. a actua den defensa propio y ta haya cu mester lag’e liber. E abogado a sigui bisa cu si Hues no ta di acuerdo, e ta haya cu mester declara G. C. liber. El a splica cu G. C. y L.W. tabata bon amigo. Despues di e pustamento di placa den un club pa bailamento caminda L.W. a gana, tur cos a cambia. E abogado a bisa cu G.C. a bay un club noctorno pa un fiesta cu su pareha. Paden el a cana bay baño y L.W. a dal’e na cara. L.W. tabata cu dos otro homber. E momento ey G.C. tabata sinti su mesa menaza y a saca e Stanley Mes y hinca L.W. y a bay. E abogado ta haya cu G.C. a actua asina door di e situacion cu el a hay’e confronta cun’e. E abogado a bisa cu for di documentonan no por saca afor si ta un herida severo. Ta un biaha so G.C. a hinca y no tabata su intension di causa herida severo. Na opinion di mr. Carlo, aki por papia di maltrato cu arma y no maltrato cu arma cu consecuencia severo. El a bisa Hues cu G.C. ta arepenti di loke el a haci. E abogado ta conclui cu mester declara G.C. liber di intento di mata y castiga G.C. pa maltrato cu arma y un castigo igual na loke G.C. ta sera caba.
HUES A BAHA CASTIGO EXIGI PA FISCAL
Hues a sera tratamento di e caso y a bay evalua un rato. Ora el a bolbe, Hues a bisa cu e ta dicta sentencia di biaha. Hues ta haya cu G.C. a hinca L.W. den bariga. E forma di hinca ta causa risico cu L.W. por a muri. Hues ta haya G.C. culpabel di intento di mata. Hues a mustra cu tin discusion di defensa propio of no. Hues ta haya cu G.C. a defende su mes pero a bay di mas. Hues a rechaza e defensa cu G.C. a actua den defensa propio. Hues a bisa cu no a sali na cla cu G.C. tabata teme pa su bida door cu tabatin dos otro persona hunto cu L.W.
Pa cu e castigo, Hues a bisa cu tin punto di orientacion pero no por us’e den e caso aki. Den e caso aki e victima a cuminsa promer y G.C. a actua. Hues a tene cuenta cu G.C. ta promer biaha e ta cay den man di husticia y e ta arepenti. Hues ta haya cu mester manda señal den comunidad pa no ta tolera hincamento. Hues a condena G.C. na 18 luna di prison di cual 6 luna ta condicional cu 2 aña di prueba. E tempo di prueba, G.C. mester cay bou guia Reclasering.
