Recien den Corte di Husticia, Hues a dicta sentencia den e caso penal cu Ministerio Publico a cuminsa contra e homber A.L. (53).
SOLO DI PUEBLO por a compronde cu apesar cu Fiscal a pidi pa declara A.L. liber, Hues ta haya A.L. culpabel y a conden’e.
MALVERSA MAMA
Dia 18 Juni 2026, tratamento di e caso a tuma lugar caminda Fiscal ta acusa A.L.(53) di intencionalmente a malversa 200 mil florin cu carchi di banco di su mama V. entre Januari 2021 y 9 December 2025. Fiscal a mustra cu A.L. tabatin e carchi pasobra e tabata maneha asuntonan financiero di e mama.
Hues a bisa cu e mama a declara cu A.L. a abusa di dje door di usa tur e placa di carchi banco. Segun e mama, WEB a corta awa y e no por a cumpra un frishidaire. Hues a bisa cu A.L. a bisa Polis cu e tabatin autorizacion di su mama. Segun A.L. e tabata na Colombia y su ruman homber grandi cu a fayece a pidi’e pa bin bek. A.L. a bisa Hues cu su otro ruman homber J. tin rabia riba dje y door di esey tur e cos aki a bin dilanti. Hues a para A.L. y bis’e cu e por compronde cu tin problema familiar pero esey no ta e caso. E caso ta e malversacion di e placanan di e mama.
Segun A.L. el a haya na September 2021 di su mama e carchi di banco pa lanta placa. E tabata bay paga coriente, awa y belasting. El a bisa cu el a haya permiso di su mama pa usa placa pa traha un barber shop luhoso. Segun A.L., e mama mes a bay diferente na e barber shop. Na dado momento e no a sigui cu e barber shop y a bay cas bek.
Segun A.L. nunca el a usa 200 mil florin. Hues a remarca cu ta e mama mes a bay Polis pa haci denuncia.
INFORMACION DI BANCO
Hues a bisa cu segun informacion di banco, desde 2021 e cuenta di banco tabata wordo haci bashi. Casi tur dia tabata lanta entre 1000 y 2000. Na 2023 e fondo a baha casi full. Segun A.L. el a gasta entre 60 y 80 mil florin pa traha e barber shop. E ta para riba cu e no a horta e placa.
DEMANDA
E ruman homber J. a representa e mama den Corte y a bisa cu e demanda ta 200 mil florin. El a bisa cu ora el a bay serca su mama cu tabata den hospital, el a haya sa cu pa tres luna, awa y coriente a wordo corta. J. a bisa Hues cu e placa di pensioen di su mama tambe no tabata tey. El a bisa Hues cu awor, su mama tin 44 % di su pensioen pa luna pa e por biba. J. a bisa Hues cu e ta sigur cu su mama no por a bay banco manera A.L. ta pretende.
FISCAL
Fiscal a bisa Hues cu e asunto ta draai riba permiso di e mama pa A.L. gasta placa. Fiscal a mustra cu A.L. ta bisa cu e tin permiso y e otro ruman J. a bisa cu A.L. no tin permiso. Fiscal a remarca cu ta increibel cu un mama ta duna permiso pa lanta asina hopi placa. Na opinion di Fiscal, e problema ta cu no tin nada riba papel. E ta haya cu no tin ningun prueba cu tin permiso. E ta haya cu e no por exigi castigo y ta pidi pa declara A.L. liber y declara no admisibel e demanda di e mama.
ABOGADO
Abogado mr. Ras a bisa Hues cu ta riba peticion di e mama y e ruman A. cu a fayece, A.L. a bin Aruba bek for di Colombia. E abogado ta haya cu e mama a duna A.L. permiso pa habri e barber shop y a duna A.L. e carchi pa por lanta placa. Na opinion di abogado, no ta asina cu A.L. a malversa placa sino cu permiso di mama, e tabata lanta placa. Despues e mama ta bisa cu A.L. a caba tur e placa. E abogado a menciona un caso caminda Corte a constata cu no tin malversacion door cu e persona a haya permiso. El a mustra cu e mama mes tabata bay varios biaha cu A.L. banco pa lanta placa. E abogado ta haya cu e relato di banco, no por wordo considera original. E abogado a mustra cu e otro ruman lo tin interes den interesnan di e mama (93) pa haya propiedad. Entretanto e ruman y mama a cuminsa un caso civil contra A.L. E abogado a mustra cu tin anotacionnan di banco cu ta mustra cu e mama a lanta placanan pa diferente fiesta y e trahamento di barber shop.
HUES A CONDENA HOMBER
Dia 9 di Juli 2026, Hues a dicta sentencia. Ta asina cu A.L. no a presenta. Hues ta haya importante e relato di banco. Hues a rechaza e ponencia di abogado mr. Ras cu e relato di banco no ta real. Hues a bisa cu el a usa e relato di banco como prueba. Hues a sigui bisa cu no solamente el a usa e relato di banco, sino e denuncia di mama y declaracion di A.L. mes como prueba.
Hues a mustra cu e mama a bisa cu el a duna A.L. carchi di banco pa lanta placa. A.L. a admiti esey y a bisa cu el a lanta 80 mil florin pa traha un barber shop.
Hues ta haya e caso asina serio caminda A.L. a usa tur e placa, cu no a keda placa pa paga gastonan di cas. Hues ta haya cu intencionalmente A.L. a lanta placanan. Hues a bisa cu en todo caso A.L. mes a bisa cu el a lanta 80 mil florin. Na opinion di Hues, no tin duda cu A.L. a lanta mas placa pero no tin prueba. No tin indicacion exacto cuanto placa A.L. a malversa.
Hues a bisa cu e mama a demanda 200 mil florin y 10 mil pa gastonan di proceso. Hues a declara no admisibel e demanda pa 200 mil. Hues a bisa cu e ta honra 80 mil y no e gastonan.
CASTIGO
Hues ta haya cu A.L. a abusa di e confianza cu su mama a pone den dje. Hues a mustra cu A.L. no a mustra cu loke el a haci ta malo. Hues a condena A.L. na 35 dia di prison di cual 30 dia ta condicional cu 3 aña di prueba. Ademas Hues a condena A.L. na 180 ora di trabao pa comunidad. Hues a bisa cu si A.L. no cumpli cu e trabao pa comunidad, e lo mester bay 90 dia sera. Hues a ordena A.L. pa paga 80 mil florin. Hues a pone medida di pago cu ta encera cu si A.L. no paga, e lo mester bay sera.
