Diahuebs mainta, Hues di Corte di Husticia a dicta sentencia den e caso penal cu Ministerio Publico a cuminsa contra e homber Colombiano biba na Aruba, P.(44). P. a wordo asisti pa abogado mr. Mohamed.
SOLO DI PUEBLO por a compronde cu mientras cu Fiscal ta haya P. culpabel, Hues a declara P. liber pasobra no tin prueba.
E acusacion contra P. ta cu riba 6 Februari 2025, el a mishi cu e yiu muher di su pareha, A., y masturba riba e sofa unda A. tabata drumi.
Luna pasa tratamento di e caso a tuma lugar caminda Hues a bisa cu e yiu muher A. a yama Polis y amigonan, bisa cu P. a mishi cun’e na su parti intimo y cu P. a masturba banda di dje. El a haya ataque di panico. Segun P., A. ta sufri di problema psycologico. El a bisa cu den pasado A. a wordo viola. Door di problema mental, A. lo ta kere cu P. lo bay abusa di dje. P. a bisa cu dia 6 Febuari 2025, e tabata na e cas hunto cu su yiu di 5 aña den camber y A. tabata drumi den sofa. El a bisa cu normal, ora e mama bay traha, A. ta sali y no ta keda den cas cun’e. Sinembargo e dia ey A. a keda den cas. P. ta conclui cu aki ta mira cu A. a planea algo pa perhudik’e. El a bisa cu e no sa si e ataque di panico tabata un set up of no. El a bisa Hues cu A. sa haya e ataque di panico regular. El a bisa cu e tabata drumi y ora el a tende hende bati na porta, el a bay habri e porta y tabata Polis.
Segun P., hopi biaha A. ta acus’e di a abusa di dje. El a bisa cu hopi biaha A. ta set up problema entre e. y e mama. A. ta yama Polis y ora Polis yega e ta bisa nan cu P. kier a abusa di dje. Ora Polis puntr’e, e ora ey ta bisa cu P. no a haci nada.
FISCAL A EXIGI CASTIGO
Fiscal ta haya P. culpabel di a mishi cu e mucha A. Fiscal ta considera esaki, actonan inmoral caminda a tacha e integridad di A. Fiscal a bisa cu esaki por causa cu A. lo por keda afecta pa hopi tempo. Pa cu e castigo, Fiscal a bisa cu e ta tene cuenta cu e tempo cu P. tabata sera relaciona cu e caso. E tabata 105 dia sera. Fsical a exigi 180 dia di prison, di cual 75 dia ta condicional cu un tempo di prueba 2 aña.
Abogado mr. Mohamed ta haya cu P. mester wordo declara liber pasobra no tin ningun prueba. El a bisa cu e mucha A. mes a saca potret di liquido riba deken di su cama y bisa Polis cu ta P. a masturba eynan. A tuma muestra di e liquido y manda esaki NFI, Hulanda, caminda a constata cu no tin sperma. E abogado ta haya cu no tin ningun prueba y P. mester wordo declara liber.
HOMBER DECLARA LIBER
Awe mainta Hues a bisa cu e ta haya cu no a keda legalmente proba cu P. ta culpabel y ta declar’e liber.
Hues a bisa cu miembro di Forence a tuma muestra di liquido riba deken caminda segun A., P. a masturba. A manda esaki Hulanda caminda Instituto Forence di Hulanda (NFI) a haci investigacion y no a haya nada di sperma. Door cu no tin prueba, Hues no ta convenci cu P. a mishi y haci actonan inmoral cu A. Hues a declara P. liber. Por a mira cu e mama di P. y su pareha a keda contento cu e decision di Hues.
