Texas, USA:
E homber Jadin Nunez (27) na Texas lo bay pasa pa resto di su bida tras di tralie despues di a maltrata e yiu muher (2) di su pareha Ashley Marie McAlphine te cu e criatura a fayece.
Siman pasa Jury di Bell County, Texas, a haya e homber Jadin Nunez culpabel di e morto, di un criatura di 2 aña. E caso tristo aki a sosode na September 2019.
E criatura Shannah Mc Alphine lo a bay cumpli su di dos aña. E homber y e criatura tabata preparando pa sali bay cumpra algun cos pa e fiesta di cumpleaños di criatura.
E homber a maltrata e criatura pa motibo cu mucha lo a bisti su sapatonan pa robes. Esaki a pone e homber bira asina furioso cu e la cuminsa maltrata e criatura sin piedad, cu e mucha no a sobrevivi e golpinan cu e la ricibi. E criatura a ricibi un cantidad di mokete den su cara y despues algun mokete den su stoma.
Fiscal a bisa cu polis a wordo pidi na e cas caminda, e criatura, e homber, Jadin Nunez y mama di e criatura Ashley Marie McAlphine tabata biba.
Na yegada nan a topa cu e criatura seriamente herida. E tabata cubri bou blousianan y no tabata reaciona mas. Paramediconan di ambulance no por a haci nada mas pa e victima, e criatura di apenas 2 aña a fayece di e golpinan severo cu e la ricibi.
Siman pasa e homber a wordo sentencia pa bida largo sin chens di wordo laga den libertad condicional.
