Bushiribana: Diaranson den oranan trempan di mainta lo a bin topa cu un SUV marca Honda, color Blanco, e auto tabata para cara pa lama net panort di e ruina di Bushiribana. Un par di meter patras di e auto tabata tin un homber den short benta abou den e tera. Den e area unda e homber tabata benta por a nota rastronan den e tera cu ta indica cu un porsibel lucha of bringamento lo por a tuma lugar eynan.
Polis y ambulance mesora a wordo avisa. Hopi lihe polis a yega na e sitio y a nota cu tin un indicacion cu posibelmente lo no ta trata di un morto natural. E auto tabata gestart y e porta di auto habri, e homber benta na suela no tabata mustra di ta duna señal di bida. Mesora a pidi pa autoridad competente.
Na yegada di ambulance e paramediconan no por a haci nada mas pa e victima, y a pidi pa un dokter. Dokter forensico Dr. Scholten a presenta pa constata morto.
Varios unidad di polis a presenta pa cera e area. Tambe por a mira na e sitio departamento tecnico di polis cu mesora a cuminsa cu e investigacionnan necesario. Janine di Slachtofferhulp tambe tabata na e sitio pa atende cu cualke familiar o amistad di e victima cu lo por presenta.
