E performance di pintura HOMENAJE NA REMBRANDT lo ta un evento especial atrobe, durante e ultimo mercado di arte regional di 2025, organisa pa fundacion “Kunst en Cultuur aan de IJssel”, diadomingo 17 di augustus na plaza Grote Kerkhof, banda di iglesia Lebuïnus y dilanti Stadhuis, den curazon di Deventer.
Lo tin mas artista activo manera na Mont Martre, cu ta paga pa por participa. Publico por admira y/o cumpra obra di arte varia y especial di varios artista di region.
E famoso pintor Arubano cu ta biba na Deventer, Gustave Nouel (GN), atrobe lo ta invitado especial, cu organizador di e evento ta sponsor, p’e comparti su performance di pintura HOMENAJE NA REMBRANDT. Segun GN (www.gustavenouel.nl), su ‘performance’ ta un homenaje n’e Rembrandt van Rijn ‘intemporal’, e retratista mas famoso di tur tempo cu su talento pictorico inigualabel, otorga pa Dios!! Humanidad semper ta scohe libremente pa usa nan ‘talento divino’ pa cos ‘bon’ o ‘malo’. (constructivo o destructivo)
Desde cuminsamento di e mercado di arte nobo aki na Deventer na 2024 e famoso pintor Arubiano ta invitado especial di fundacion “Kunst en Cultuur aan de IJssel” p’e participa cu su performance HOMENAJE NA REMBRANDT.
Asociacion di artista DAK (https://www.deventeramateurkunstenaars.nl/), caminda e pintor Arubano ta un ‘mentor’, lo promove nan arte y creatividad den e stand di GN. Algun artista di DAK, (ex-)alumno di GN, tambe lo ofrece publico sketch di portret ‘gratis’ (‘gratis’ = publico ta dicidi prijs).
GN (te awor) t’e unico artista di Parti di nos Reino den Caribe, cu a logra comparti su Arte (su JAZZ ART) oficialmente den Pabejon Hulandes durante un Exposicion Universal (WORLDEXPOSEVILLA ’92). Na Aruba hopi hende ta considera GN, como e Rembrandt di Aruba. ‘HALL OF FAME’ na Aruba, den ‘Paseo Nos Herencia’ ta reconose GN como un di e persona/artista mas famoso den historia di Aruba.
Paul Moerkerken, ex-director di teatro na Deventer y actualmente presidente di fundacion “Kunst en Cultuur aan de IJssel”, ta organisa actividad di Arte y Cultura pa tur disciplina di arte, na diferente luga. Na 2026 Paul kier sorprende publico na Hulanda cu un proyecto especial hunto cu e artista Arubiano GN, durante un gran mercado nacional di Arte den centro di Deventer (riba plaza DE BRINK).
Na hulanda GN ta ser considera un pintor internacional cu a jega di representa Deventer oficialmente cu su Arte den intercambio cultural, un ‘artista’ virtuoso cu edad di pensioen, pero cu ainda tin energia pa comparti su expertise riba tur nivel, internacionalmente. (https://kreolmagazine.com/culture/art/gustave-nouel-a-modern-art-virtuoso/)
