Nos ta bibando un tempo di cambio, awe nos ta papia di corporate Gouvernance cu su reglanan con pa administra un entidad, tambe di integridad, di democracia y mas.
Tur ta asuntonan esential, pero den SEPPA, parce esakinan no ta factible. Hasta e reglanan básico di democracia cu elecionnan segun leynan y reglanan democratico no ta existi mas.
Por ehempel den SEPPA, e información cu tur miembro mester ricibi ta kendenan actualmente ta forma parti di e comité ehecutivo, kendenan tin e maneho den SEPPA y kendenan ta miembronan di directiva, cual ta e órgano pa controla e maneho den SEPPA.
Tambe ki tempo tin elecion den SEPPA, segun su statutonan. E miembro, no sa.
Integridad ta e alma di democracia dentro di un sindicato. Esaki no ta e caso den SEPPA
Integridad y Democracia ta mara na e statutonan y reglamentonan interno di e sindicato den cual tin e metanan, e normanan y balornan sindical.
Sra Brito ya tin 25 aña como líder máximo di SEPPA.
Den e temponan aki cu nos ta yama moderno, bo no ta haya esaki den organisacionnan sindical drechi mas, pero den sindicatonan autoritario, cu un tendencia dictatorial, unda e poder ta keda cerca un persona y democracia ta ser degrada, unda defacto ta e líder ta dicidi tur cos, pues e líder ta ser yama dictador.
Nos ta di opinión cu ningún miembro kier esaki pa SEPPA.
Un lider mester keda maximo 12 aña den un funcion, antes e tabata asina den SEPPA.
Otro caracteristicanan, ora un líder pasa 12 aña como líder di un organización e persona aki, den mayoría di caso ta tuma como normal, actitudnan autoritario y negativo, cualnan no ta bon ni pa e organización, ni pa e persona mes.
Tur caminda di mundo bo ta lesa y scucha cu e forma realistico, pa lidernan eherce nan trabao ta mara na periodonan.
1.Ora bo tuma un función nobo, como persona yen di entusiasmo pa eherce e función e
prome añanan (3 pa 5), bo ta haci lo máximo pa siña e trabao (periodo di aprendisahe).
On the job y cu otro formacionnan bo ta prepara bo mes pa eherce e función den e
mihor forma;
2. Despues tin e periodo (+ 5 aña) cu tur dinamismo bo ta duna lo máximo na e
organización y sigui prepara bo mes mihor y uza bo saber optimalmnte pa haci e trabao
Correctamente;
3. Despues di 10 aña ta bini e periodo di “Free Wheel”;
a. Bo ta tuma tur cos mas suave;
b. Poco a poco e dinamismo ta cayendo;
c. Hopi preparación no ta asina necesario mas;
d. Ta aparece e fenómeno cu yama flohera, yega trabao laat y traha pa dia 4 of 6 ora so;
e. Papiamento ta bira algo sin fin y sin bisa mucho cos, loke na papiamento nos ta yama
telele tambe ta haci su entrada;
f. E mentalidad pa maniobra, pa manipula , pa dicta ta drentando mas y mas.
Despues di 12 aña ta drenta e periodo, na hopi ocacion pa manipula y dicta.
Si e periodo dura mas largo cu 12 aña, mas atrás e organización ta bay y igualmente e persona envolví, maske e persona mes no ta conciente di esaki, pasobra manipulacion y ser autoritario a bira su modus operandus.
Un táctica macabro pa no duna formación tambe ta haci su entrada. Preparación y formación ta asina importante pa mantene e dinamismo den e organisacion, trece cambio den liderazgo y prepara e generaciónnan di relevo pa tuma over.
E hecho pa no trece preparacionnan y ni formación pa lidernan nobo por ser mira como un táctica macabro y sigur pa e función di Secretario General. Dor di no tin lidernan nobo forma, hopi lo bisa pa laga e persona cu ta eherciendo e funcion di líder mes keda.
Pero con cu wak e, pa miembronan y delegadonan conciente, un líder nobo ta hopi mihor cu un líder cu ya tin 25 aña den mesun función. Un persona cu mas di 25 aña como líder sindical ya no tin e dinamismo mas, su flohera ta aumentando cada dia mas y mas, igualmente e mentalidad pa maniobra, pa manipula, pa ta autoritario y hasta pa dicta.
Pues den tur sentido un líder nobo pa SEPPA, pa miembronan, awe ta e mihor solucion.
Secretario General di SEPPA ta uzando tactica robes
Den Diario di 17 juli 2025 secretario General di SEPPA M. Brito ta haci un sumario correcto di problemanan di trahadornanan den sector publico=ambtenaarnan, dor di cu tin un escases di trahadornan na diferente departamentonan, cual sigur a ser treci dor di delegadonan na e diferente departamentonan. E escases a ser causa dor di personanan cu ta bay cu pensioen, otronan cu VUT y un Aruba cu ta creciendo den habitante. Gobierno ta tuma hende cu contrato cu salario halto pero no pa yena e vacaturanan. E ta papia di un bom cu por bay explota den sector publico .
E solucion cu sra Brito ta propone ta straño y hopi robes, pa no bisa estupido o bobo.
Como lider sindical di trahadornan den sector publico, e ta mas bien duda si tin surplus financiero den e maneho di Gobierno, maske e presupuesto ta indica esaki.
Di dos, e ta proponde pa asuntonan aki wordo discuti den e dialogo nacional/social.
Pa cuminsa cu e dialogo social/nacional, den e dialogo aki tin presente e gremionan di empresarionan, cual organisacionnan semper tin un posicion contra trahadornan di sector publica y semper nan kier retira trahadornan di Gobierno.
Pues den dialogo nacional/social, bay den guera cu e hendenan aki, ta un guera perdi bo ta bringa pa e empleadonan publico.
Loke sra Brito mester haci ta como lider sindical, e ta pidi reunion cu su dunador di Trabao=Gobierno cu e posicion cu tin un surplus financiero y aki sin presencia di enemigonan di e empleadonan publico, bo ta bay lucha pa bo miembronan tocante e escases di trahadornan. Aserca awor cu tin surplus financiero den caha di gobierno, e mester trece e lucha di gelijkbedrag pa e pensioenadonan cu a bay cu pensioen e ultimo 10 añanan, pa nan y futuro pensioenadonan cu a traha pa Gobierno, tambe por ricibi nan gelijkbedrag. Igualmente pa e miembronan cu ta traha na stichtingnan, unda na 20.16, gobierno a kita e Subsidiale regeling cual ta duna e trahadornan di stichtingnan un trato igual na e ambtenaar, cu excepcion di e Ambtenarenrechter y Pensioen.
Atrobe bo ta wak cu maske bo tin 25 aña ta lider maximo di SEPPA, parce e cabes ta bashi y no a siña mucho cos. E ta keda uza tacticanan robes.
Tambe tin e rumor y Caya ta papia cu parce cu empresarionan ta fluister den horea di poco lidernan sindical pa lucha pa un Dialogo Nacional/Social pa nan por kita mas derechonan di e clase trahador trahador.
