Anualmente Horacio Oduber Hospital ta haci un analis di esnan cu acudi na Departamento di Emergencia e dianan prome, durante y despues di cambio di aña. HOH kier na prome instante gradici full e team cu a traha incansablemente durante e weekend di fiesta. Un fin di siman unda cada colega a traha duro pa asina atende tur pashent cu a yega cu un of otro problema medico. 

E analisis a cuminsa dia 30 di december 2022 pa 6pm y a termina dia 2 di januari 2023 pa 6am. E cantidad di persona total cu a acudi pa sea ricibi atencion medico na Departamento di Emergencia of dokter na warda tabata 361. Aña pasa ainda Aruba tabata den e gara di Covid y e cantidad di pashent tabata un poco menos, esta 326 y na aña 2020 hasta 262. 

E aña aki a atende 3 victima di vuurwerk. Aña pasa tabata ningun caso cu ta algo remarcabel y e na 2020-2021 tabatin 2 caso di vuurwerk.

Di e 361 persona un total di 152 a ricibi atencion medico na Departamento di Emergencia cual 54% ta masculino. E edad di mas abou cu tabatin mester di atencion na departamento di emergencia ta un baby di 3 luna y e pashent di mas grandi tabatin 94 aña. Edad averahe di e grupo cu a acudi tabata 48,7 aña. Edad cu mas a acudi Departamento di Emergencia ta entre 19 cu 65 aña.

Ta interesante tambe pa analisa e motibo di bishita durante e fin di siman di di fin di aña. Di e 152 pashentnan cu a acudi na Departamento di Emergencia 68 tabatin herida/lesion: 12 tabata involucra den un accident di trafico, 7 persona den incidente di violencia, 3 pa motibo di vuurwerk y 46 pa motibo di por ehempel caidanan, verzwik enkel, corta etc. E otro 84 casonan tabata pa motibonan otro cu no tin di haber cu traumanan fisico manera por ehempel intoxicacion, dolor na pecho, dolor di stoma, sacamento, un of otro infection, reaccion alergico etc. 

Di e 152 pashentnan cu a acudi na Departamento di Emergencia un total di 45 pashent a ser admiti den Hospital. Alabes mester bisa tambe cu 60% di pashent admiti ta masculino. Edad averahe tabata 51,6 aña.

Team completo di Hospital kier desea henter comunidad un feliz aña 2023 yena cu amor, prosperidad y salud! Y si encaso bo mester di asistencia medico corda tambe cu nos di HOH semper t’ey!

LEAVE A REPLY

Please enter your comment!
Please enter your name here