Aruba completo ta pendiente manera semper p’e prome baby di aña. Un tradicion cu tin varios aña di existencia y claro Hospital y su personal felizmente ta warda yegada di ken lo bira e prome baby pa aña 2025. Aña 2022, 2023 y 2024 tabata baby mucha homber y e aña aki Aruba ta yama bonbini n’e prome baby di aña cu ta un baby mucha muhe cu a haya e bunita nomber Madeleine.
Pa exactamente 12.36 di marduga net despues di tiro mama Magnolia Fingal a ripara cu su awa a kibra y pues a prepara pa bay Hospital hunto cu su pareha Miguel Jose Delgado Gomez. Mama Magnolia tabatin ya un operacion cesarea planea cu ginecologo pa tuma luga aki 3 siman pero baby Madeleine a didici diferente. Nan a yega Hospital y team di Maternidad a cuminsa prepara p’asina e operacion cesarea tuma luga durante ora di mainta. Pa exactamente 10:00 am baby Madeleine Johainny Delgado Gomez a nace den camber di operacion di Hospital unda ginecologo Garcia, hunto cu team di camber di operacion, tabatin e honor pa yama bonbini na baby di aña 2025.
Un momento di alegria pa famia completo mirando cu ya mami Magnolia y papi Miguel Jose tin 3 yiu homber y finalmente a logra haya nan princesa. Baby Madeleine ta pisa 2920 gram y tin un largura di 51 centimeter.
Team di HOH tabata presente hunto cu Jacco Vroegop, presidente di Hunta di Directiva di HOH, unda e la felicita mami Magnolia y papi Miguel Jose cu baby di aña 2025 Madeleine ya. Desea nan hopi felicidad cu e yegada di nan baby mucha muhe. Alabes a dun’e un regalito di parti di HOH cu sigur baby Madeleine lo por haci bon uzo di dje.
Mami y papi ta super feliz cu nan baby ta saludabel y ta gradici dr. Garcia y ful e team di maternidad pa e guia durante henter e proceso prome y despues di e nacemento.
Team di HOH ta felicita famia y Aruba cu baby di aña 2025 y alabes ta desea un y tur un prospero y saludabel 2025 yena felicidad y amor y corda cu si bo mester di nos, nos semper t’ey!
