Oficina di Seguro Medico (AZV) ta den contacto estrecho cu nan partnernan y instancianan di cuido na Colombia despues di e teremoto fuerte cu a dal e pais. E hospital cu a keda structuralmente afecta na Cali ta un di e partnernan clave di AZV, locual a lanta preocupacion, pero e nan a confirma cu e situacion ta bou di control y cu nos aseguradonan ta safe.
Plan di emergencia na Cali
Cali ta pertenece na un di e ciudadnan mas hopi afecta pa e desaster natural aki. E hospital cu ta socio di AZV a sufri daño structural considerable, locual a obliga e institucion pa para tur servicio poliklinico temporalmente. Actualmente, e personal medico ta trahando segun un plan di emergencia estricto pa brinda cuido na e personanan cu a keda afecta pa e teremoto.
Pacientenan na Bogotá y Medellín ta safe y bon
For di e informacion oficial cu AZV a ricibi, ta resulta cu tur nos pacientenan den e otro ciudadnan di Colombia tambe ta safe y den bon condicion. Tanto den Bogotá como na Medellín e situacion ta considerablemente mas trankil, y no a raporta consecuencianan severo manera a sosode na Cali.
Monitoreo riba Aeropuerto di Cali
Un otro punto di atencion importante pa AZV na e momentonan aki ta e situacion tocante e aeropuerto di Cali. Esaki ta crucial pa e aseguradonan cu pronto tin cu biaha bek pa Aruba despues di nan tratamentonan.
AZV a gradici e bon comunicacion cu nan tin cu nan partnernan na e sitio y nan ta sigura cu nan lo sigui brinda tur apoyo necesario na nos aseguradonan. E compania di seguro medico lo keda di informa comunidad asina cu tin desaroyonan relevante.
