Durante un rueda di prensa yama pa Alan Howell diamars mainta dilanti cede di POR na Sanicolas, e parlamentario a amplia mas riba e caso cu a presenta dia 30 di Maart, net un siman pasa, cual a conduci na caida di Gobierno di Aruba den lapso di algun minuut.
Segun Howell a bisa, el’a haya un carta di Landsrecherche cu ta splica cu ta bay haci un investigacion riba e fondo di fraktie di POR den parlamento y a pone beslag riba su cuenta personal. Den e carta no ta splica den detayes over kico e caso ta ni pakico, solamente ta menciona un strafrechterlijke onderzoek. Tampoco e carta ta menciona cu el’a wordo apunte como sospechoso!
Ta bien posibel segun artikel 119, cu bo por tuma algo den beslag sin cu e persona ta sospechsoso. Ta un shock grandi pa hayami den e siutacion aki, y mi no sa de que se trata, Howell a bisa.
Por medio di diferente reporteronan, a papia hopi cos, parce cu ta nan mes ta traha na MOT, of ta nan mes ta traha na Landrecherche, pasobra nan tin hopi informacion cu ta solamente e recherchenan cu ta traha den e caso, so por sa.
Caida di Gobierno, di sorpresa:
Howell a sigui splica cu na momento cu el’a haya e carta, el’a bay trabao, y durante cu e ta sinta, whatsapp ta sona un tras di otro. Ta haya un comunicado di OM, splicando kico ta pasando. “Ma keda sorprendi”. E comunicado ta hopi diferente di e carta cu su persona a haya.
Masha cortico despues di esey, Minister Presidente a yame na telefon, Howell a contesta, cu “mi no por bisa hopi, e carta ta bisa cu nan ta pone beslag riba e fundacion y riba un cuenta dimi personal”. Minister President a bisa: Kemen cu ta cubo mes nan tine anto!!? El’a cera telefon, su tras Minister Bikker a yama: Howell ta kico ta pasando? Ma keda straño cu tur dos a yama tras di otro. Bikker a duna Howell conseho, kico e mester haci y a cera e telefon.
Den lapso di algun minuut, Gobierno a cay!
Howell: Ma lanta para, cana den mi kantoor, y dentro di un lapso di tempo 5 minuut, mi ta haya notificacion, cu sostendornan ta bisami cu Gobierno a cay. Nan a bisa cu SI, gobierno a cay. Un bon amigo a yama puntra kico ta pasando. Con ta posibel cu Gobierno por cay den fraccion di algun minuut? Con por ta posibel? Mi ta lage pregunta pa cada hende por contesta nan mes.
Riba dje, mi ta un lider di coalicion. Tin tres, Sra. Wever Croes, Ricardo Croes y mi persona. Con ta posibel cu no a yama un reunion urgente cu e lidernan di coalicion, pa delibera, papia, puntra? Kisas nan si tabata sa, kico ta pasando y a hunga rol pa ganja yamami y puntrami.
Mi no ta haya ta husto, cu ta tira un gobierno abao, riba nomber di Alan Howell, y djey grita manyan cu bo kier mandato completo.
Nota di redaccion: SOLO DI PUEBLO a tuma contacto cu Ministerio Publico, pa verifica si Alan Howell a keda apunta como sospechoso. Ministerio Publico a bisa: “a menciona solamente sospecho di malversacion” y OM no ta duna mas comentario na loke e comunicado di prensa cu a wordo emiti dia 30 di Maart. Conlcucion di SOLO DI PUEBLO ta: Sr. Alan Howell no ta un sospechoso te ne momento aki. ( kisas por bira den futuro!)
