Mester bay video-live riba 24ora pa pidi despensa y publica un articulo; Si no cumpli tin boet di 250 mil florin
Diaranson mainta, hues a dicta sentencia den e caso di Kevin Wever ( yiu di Promer Minister Evelyn Wever Croes) a cuminsa contra Jan de Ruijter y Micheal Williams di Fundacion Nos ta Aruba.
E duo a acusa Kevin Wever di tine graba riba tape con e ta negosha tereno pa actividadnan di marihuana. Nan intencion tabata pa asina critica e mama y rebaha e famia te na vloer, cu nan ta haciendo corupcion.
Den corte, ningun di nan dos por a presenta un prueba. Loke nan a presenta ta stem di Arturo Mansur y no di Kevin Wever.
Hues a baha pisa riba e duo, mustrando cu nan ta “lansa grito for di dak”, cu no ta basa riba ningun prueba.
Hues a ordenanan pa rectifica, via 24ora.com, den e mes un parke cu nan a graba e video infunda, y sin duna ningun comentario mas, y sino cumpli, lo cuminsa core un boet di 500 florin pa dia, te cu maximo di 250 mil florin.
Esaki sigur ta un sentencia contundente pa frena tur esnan cu ta papia cosnan, trece acusacionnan, cu nan no tin prueba. Lansa un critica politico ta algo completamente otro cu bay lansa calumnia contra personanan den comunidad, cual e ora ta bida difamacion.
Jan de Ruijter cu a girta manera galiña kloks cu e tin prueba y a reta Sra. Evelyn, su yiu Kevin, Hendrik pa hibe corte, unda e lo trece prueba, awor mester bay pidi disculpa, pidi pordon y bisa cu el’a trece calumnia dilanti.
E video di rectificacion lo mester sali dentro di poco riba 24ora.com.
SOLO DI PUEBLO ta felicita Kevin Wever y abogado Anthony Ruiz, kende ta determina pa trece claridad pa su clientenan na cualke momento y aki un bes mas ta frena difamacion econtra di Kevin Wever.
