Diabierna mainta, Hues di Corte den Promer Instancia a dicta sentencia den e caso penal cu Ministerio Publico a cuminsa contra e homber Haitiano C.E. (51) biba na Aruba.
SOLO DI PUEBLO por a compronde cu Hues no a sigui Fiscal den su exigencia di 4 aña di prison y 10 mil florin di boet. Hues a baha e castigo te na 10 luna di prison y 5 mil florin di boet.
SENTENCIA
Hues den su sentencia a mustra cu un dama cu a traha prostitucion, a haci denuncia contra C.E. Despues di investigacion door di e instancia concerni, tres otro dama a haci denuncia di traficacion di hende contra C.E. Hues a bisa cu segun abogado mr. D.Croes, voluntariamente e damanan a bin Aruba y no tabatin obligacion pa nan traha.
NO TIN PRUEBA
Hues a mustra cu e acusacion contra C.E. ta cu entre 1 Juli 2024 y 24 Februari 2025, C.E. a trafica dos dama y obliga nan pa traha. E dama di Santo Domingo T.(31) a declara na Polis, cu el a traha den prostitucion y for di un amiga Colombiana el a tende cu e por bin Aruba. El a yama C.E. pa bin. C.E. a manda un acuerdo pa T. y T. a firma. El a bin Aruba y a haya un camber na un bar na San Nicolas. E dama Colombiano F. (34), a declara na Polis cu el a traha na varios pais den Caribe y hasta Aruba den prostitucion. El a bin Aruba atrobe y traha serca C.E.
Hues ta haya cu no tin prueba cu C.E. a forza nan y pesey ta declara C.E. liber di e acusacion di lo a forza nan traha.
DAMANAN TRAHA ILEGAL
Pa loke ta e acusacion di traficacion di hende, Hues ta haya cu C.E. a laga e dama F. sigui traha siendo cu su tempo a pasa. Hues a mustra cu e dama C., a bin Aruba como turista y segun ley e no por a traha. Sinembargo el a traha den bar y tabata haci e lugar limpi. A cambio di su trabao, e tabata haya estadia.
Hues ta haya cu C.E. tabata sa cu e traficacion di hende ta ilegal y tabata gana placa riba nan cabez. Hues ta haya C.E. culpabel di traficacion di 2 dama.
BAHA CASTIGO
Hues a bisa cu Fiscal a exigi 4 aña di prison di cual 6 luna ta condicional pa C.E. Hues a bisa cu door cu el a declara C.E. liber di a forza e damanan traha, e demanda di un dama di 16 mil florin ta keda declara no admisibel.
Pa e traficacion di 2 dama, Hues a condena C.E. na 10 luna di prison di cual 4 luna ta condicional. Hues tambe a condena C.E. na paga un boet di 5 mil florin y si e no paga esaki, e lo mester bay 10 dia sera den prison.
