Diahuebs mainta Hues a trata un caso penal y dicta sentencia di biaha, siendo cu e acusado no a presenta.
SOLO DI PUEBLO por a compronde cu e homber Colombiano M. (67) a bay for di Aruba, mientras cu e sa cu e tin e caso contra dje. Hues a dicidi di trata e caso tog y a conden’e na 4 aña di prison pa a abusa di su nieta menor di edad.
TRES ACUSACION DI ABUSO
Fiscal a presenta tres acusacion contra M.
** E promer acusacion ta cu den e periodo di 22 Augustus 2023 te 29 October 2023, M. a abusa di su nieta menor di edad.
** E di dos acusacion ta cu entre 2012 y 2015, M. a abusa di un otro famia, un mucha muher menor di edad.
** E di tres acusacion ta cu entre 2011 y 2012, M. a abusa di un otro famia, un mucha muher menor di edad.
FISCAL A EXIGI 5 AÑA DI PRISON
Fiscal a bisa Hues cu casonan asina ta fastioso pasobra tin declaracion di e victimanan contra declaracion di e sospechoso. Esey ta haci cu mester busca mas prueba.
Den e caso di e nieta, Fiscal a mustra cu e mama di e victima a mira su yiu ta keha di dolor. Asina a bin haya sa di e abuso cu e Opa a haci.
Den e caso di e otro dos muchanan, e muchanan a declara cu M. a bay siña nan core auto y tabata laga nan sinta den su scochi. E momento ey e tabata mishi cu nan partinan intimo. Segun e muchanan, esaki tabata sosode diferente biaha.
Fiscal a bisa Hues cu den e caso di e dos muchanan, e ta haya cu por usa como prueba cu M. a haci mesun cos cu tur dos mucha.
Fiscal a exigi 5 aña di prison pa M.
HOMBER CONDENA NA 4 AÑA DI PRISON
Hues a sera tratamento di e caso y a bay evalua un rato pa despues dicta sentencia. Ora Hues a bolbe den sala di Corte, el a bisa cu e ta comparti punto di bista di Fiscal cu M. a abusa di su nieta. Hues ta haya cu tin suficiente prueba di sosten pasobra e mama di e victima a mira su yiu tabata keha di dolor na su parti intimo.
Pa loke ta e otro dos muchanan, Hues ta haya cu mester ta cauteloso pa bisa cu ta e mesun forma di actua di e sospechoso M. y usa esey como prueba di sosten. Hues ta haya cu no tin suficiente prueba y a declara M. liber pa e acusacion di abuso di e dos muchanan.
Hues a bisa cu e ta haya e promer caso hopi serio. Hues a sigui bisa cu abuso di mucha por afecta e mucha y casonan asina ta wordo rechaza den comunidad. Hues a condena M. na 4 aña di prison.
